ZALEN August 22, 2026: Serchhip DC ruahmanna in National Highway 02 Inspection Team te chuan nimin khan Keitum leh Khumtung inkar kawng chhia repair mek te an endik leh a, tun dinhmunah chuan duhthusam chiah la ni rih lo mah se, a tha thawkhata an hriat thu an sawi. Chutihrual erawh chuan fur ruahtui tlak lai a nih avangin kawng hi ni hnihkhat thil thu leka la khuar chhe zung zung thei a ni a, chuvangin Daily Maintenance kalpui reng turin Contractor te an chah.

National Highway Inspection Team kaihruaitu Addl. DC Dorothy Muansangi chuan NHIDCL te leh an hnuaia Contractor (KRAM Infracon Pvt. Ltd., Shivalaya Construction Ltd. leh Bhartia Infra Projects Ltd.) te chu Serchhip District in kawngpui tha leh tlo kan neih theihnan District Administration level atangin an vil reng dawn tih a hrilh a, Joint VC, Sub-Hqrs. YMA leh MJA te nen tangkawpin National Highway Inspection hi an kalpui zel dawn tih hrilhin inthlahdah lo turin a hriattir.

Vawiin atang hian NH 02 Serchhip By Pass Road - Kikawn to Sailiamkawn inkar kawng chhia pawh thawmthat hna thawh tan nghal a ni a, hemi atana khawl hman tur te pawh nimin August 21 khan chhawp fel an ni tawh a, ni 7 chhungin Contractor Kram Infracon Pvt.Ltd. te hian a khuar chhe zualpui hnawh zawh hman an tum a ni.

Kawng siam mek endik hna hi Addl. DC Dorothy Muansangi bakah Chawngthu Lalrinhlua SDC te, Joint VC atangin an Vice Chairman PC Vanlalvena leh Sub-Hqrs. YMA lam atangin an President PC Vanlalluna a tel a, MJA lam hi an President Kapliana Pachuau hovin member engemawzat an thawkchhuak bawk. Kram Infracon Pvt.Ltd. General Manager Ayush Tiwari leh an Public Relation Officer (PRO) Lalhruaitluanga te an tel bawk.