ZALEN September 17, 2026: Tourism Minister Lalnghinglova Hmar chuan vawiin khan Zo-hall, Tourist Lodge, Chaltlang-ah, Mizoram State Commission for Promotion of Child Rights (MSCPCR) buatsaih, Mizorama Tourism thangduang tak kara Naupangte himna ngaihtuah (Promoting Child-safe Tourism in Mizoram) tih thupui hmanga Inrawnkhawmna hun chu khuallian niin a hawng.

Lalnghinglova Hmar chuan MSCPCR-in Mizorama Tourism thang chho mek thlir chunga ngaihtuah tul tak naupangte himna chungchanga Inrawnkhawmna hun a buatsaih chu lawmawm a tih thu a sawi a. ‘Ram hmasawn ang zelin chona hmachhawn tulte a inthlakin, chumi hrulah chuan ngaihpawimawh tulte pawh a inthlak tel’ a ti.

Minister hian Mizorama Khualzin lo lut pun chak dan tarlangin, nikum 2025-a Mizorama khualzin lo lut zawng zawng mi 841322 an nih thu leh kuminah chuan July thla thleng khualzin lo lut zat pawh 612463 an ni tawh tih a sawi a. Hemi ngaihtuah hian, Mizoram-ah chuan State chhunga chengte aia tam mah khualzin lo lut thei an ni tih sawiin, hemi karah hian naupangte himna ngaihtuah chu tihmakmawh a lo ni ta a ti.

Lalnghinglova Hmar chuan Minister chuan khawvel hmun dangte ang thovin Mizoramah pawh Tourism avanga harsatna thleng thin chu khel lova lo thleng ve reng thei a ni tih sawiin, chumi hmachhawnna kawngah chak taka hma la tur chuan Sawrkar chu kohhran, tlawmngaipawl leh Khawtlang mipuite hnen tha taka a thawh ho a tul tih a sawi a. Mahni zawn theuhvah sawt zawka sawrkar hmalaknate tichaka venpui tak tak theitu chu khawtlang mipuite an ni tih hriatsak hram tura kalkhawmte chu chahin, Hmingthanna zawng zawngah hmingthatna a awm kher lo tih hre chunga Consultation Meeting chu rah tha tak chhuah khawpa hmang theuh turin duhsakna a hlan nghal bawk.

Consultation Meeting hi hun thuma then niin, hun hnihnaah hian thupui thlan chhuah bikte hmangin mithiam ten kalkhawmte an zirtir a. ‘Mizoram Tourism: tun dinhmun, la thangduang zel tur lai leh hmathlirte’ tih thupui hmangin Rachel Lalrinhlui, Deputy Director, Directorate of Tourism chuan thusawiin, Child and Adolescent Labour, Prohibition and Regulation Act 1986 hmangin R. Laltanpuia MSCPCR member chuan thu a sawi a. 

‘Naupangte dikna chanvo leh a kaihhnawih dan leh hreite’ tih thupui hmangin Priscilla Lallawmsangi, Legal Officer, MSCPCR chuan thu a sawi bawk a. Hun thumnaah hian kalkhawmte atanga rawtna leh ngaihdante ngaithlak a sawiho nghal a ni a. MSCPCR chuan heng rawtna lutte hi thlifimin Sawrkarah rawtna a thlen leh dawn a ni.