ZALEN June 25, 2026 : Vawiinah khan MPCC Senior Vice President Lalnunmawia Chuaungo chuan Aizawl Press Club-ah thuthar thehdarh tute kawmin, BJP sawrkarna hnuaiah kum 12 chhungin India ram pum huap exam-ah tum 23 zet zawhna putru a awm tawh thu a sawi.

Lalnunmawia Chuaungo chuan, kumin May 3 khan National Eligibility Cum Entrance Test (NEET) exam-ah zirlai nuai 22 chuangin an exam a, zawhna putru avangin June 21 khan exam nawn tir leh an ni a; he thil thleng avang hian zirlai 12 zet an intihhlum phah a ni, a ti.

NEET paper hi WhatsApp-ah te Rs. 5,000 atanga Rs. 30,000 inkara hralh a nih bakah, Rajasthan-ah phei chuan nuai 30 thlenga hralh a ni tih a sawi a, hei hian thalaite hma hun nasa takin a tichhia a ni a ti.

MPCC Sr. VP chuan UPA sawrkar khan zirna atan budget pumpui atangin 4.7% a hman laiin, BJP chuan 2.4% chauh hmangin, bawng zun zirchianna atan erawh cheng vaibelchhia 98 zet an hmang thung tih a sawi a. Congress chuan he kalphung nunrawng tak hi tihbo an tum thu sawiin, mawhphurhna la ngam lo Union Education Minister Dharmendra Pradhan chu a hna atanga bang turin an phut thu a sawi bawk.