ZALEN May 21, 2026 : North East Students’ Organization (NESO) chuan May 20, 2026 (Nilaini) khan Guwahati, Assam-ah meeting a ko a, All Assam Students’ Union (AASU) chuan he meeting hi thlengin, Manipur-a Kuki leh Naga-te inkara buaina kal mek chungchang ngaihtuah a ni. Meeting-ah hian pawi sawilo civil mi beih, thah, rukbo leh tihhlumna thil thleng fo chungchang sawiho a ni.

NESO chuan ngun taka a ngaihtuah hnuin, heng a hnuaia tarlan thutlukna siamte hi a pawm a ni.

1. NESO chuan, tunhnaia kohhran hruaitu pawi sawilote thah leh civil mi beih an ni fo thin chu pawi a ti hle a. Remna mission-a kal ralthuam keng lo leh sualna nei lo civil mite chunga tharum thawhna thleng hi dik a ti thei ngai dawnlo a, na takin a titute a dem a ni.

2. Tun hnaia Manipur buaina avanga mi tam tak kidnap a, hrenbeh an ni hi NESO chuan pawi a ti takzet a, mi tamtak chhuah zalen ni tawh mahse hren mek an la awm a, heng mite hi himdam taka chhuah zalen turin a mantute a ngen tak meuh meuh a ni. 

3. NESO chuan Central Sawrkar chu Manipur buaina kum thum chhung a ni tawh chunga, buaina chingfel tura hmalakna mumal tak a awmlo chu na takin a dem a, rei tak buaina awm tawh hnu leh pawi sawilo tam takin nunna an chan tawh hnuah pawh India sawrkar hian a tih tur a tilo a. Chutih mek lain, buaina intan tirh atanga chhui zui theih miahlo in bo tam tak an awm a, Central sawrkar hian an chin hriat anih vat theih nan a tih tur ang ti a, hmala turin a phut a ni.

4. NESO chuan Manipur buaina in a nghawng zawng zawngte chu tharum thawhna leh phuba lakna hnawl turin a ngen a, chu ai chuan Manipur-a remna, dikna, leh nunphung pangai siamthatna kawngah tangrual a, lungrual taka thawkho turin a ngen bawk.

Meeting chuan remna a awm theih nan te, nunphung pangngai siamthar anih leh theihna turte leh buaina chhuak avanga harsatna tawk pawi sawilo civil mi zawng zawngte zahawmna leh dikna chanvo an hmuh let ngei theih nan, a tul anga hmalak chhunzawm zel nise tih a ni. He meeting-ah hian All Manipur Students’ Union (AMSU), All Assam Students’ Union (AASU), All Arunachal Pradesh Students’ Union (AAPSU), Khasi Students’ Union (KSU), Mizo Zirlai Pawl (MZP), Garo Students’ Union (GSU), leh Naga Students’ Federation (NSF) te an tel a ni.

Meeting-ah hian, Mizo Zirlai Pawl (MZP) atangin Ricky Lalbiakmawia, NESO Vice Chairman ; Dr. C. Lalremruata, President leh C. Lalhmingsanga, General Secretary te an tel a ni.