ZALEN November 9, 2025: Hunpui (Krismas leh kumthar) denchhenin Aizawl Traffic Police chuan Aizawl khawpui chhungah ‘No Tolerance Drive/Checking’ a kalpui leh dawn.

Senior SP Traffic Ruatsanga Ralte hnen atanga ZALEN thudawn danin kumin Krismas leh kumthar vuakvetah No Tolerance Drive/Checking kalpui leh a ni dawn a, kalpui tan hun tur ngaihtuah mek niin, mipui hriat turin puan chhuah a la ni ang. 

2024 Krismas leh 2025 kumthar vuakvetah Aizawl khawpui chhung hmun hrang hrangah khan December 9 atangin Aizawl Traffic Police-in driving license neiloa lirthei khalh, insurance certificate nung lo lirthei, Pollution Under Control Certificate (PUCC) nung lo, mipui leh bungraw phur lirthei fitness certificate neilo leh lirthei kaihhnawih dan bawhchhiatna hrang hrang avanga vanduaina thleng thei venna atan No Tolerance Drive/Checking hi a lo kalpui tawh.

Aizawl Traffic Police hotute chuan lirthei khalhtu zawng zawngte chu dan zawm a, fimkhur taka lirthei khalh turin an hriattir tih an sawi a, lirthei document felfai tak nei tura lo inhmakhua theuh turin lirthei neitute an ngen tih a sawi.

Traffic Police hotute chuan lirthei dan bawhchhia an man tam ber chu phal lohna hmuna lirthei dah te, khawpui chhunga one way leh entry period zawm lo te, tlan phal loh zawnga tlan leh kual phal lohna hmuna kualte an nih tlangpui thu an sawi a, lirthei tlan tluang tikhaihlak khawpa lirthei khalh leh dah ang chi te, mahni duh dana lirthei number lo ziah ve ngawt te, te lutuk leh a bikin bike mei (tail) hnuaia number vuahna siam leh tereuhte an vuahte an man tam zual thin niin an sawi bawk.