ZALEN February 22, 2026: Mizorama damdawi in (private hospital) 12-in Mizoram Universal Health Care Scheme (MUHCS) an la zawm lo a, la zawm lote hi Non-Government Hospital Association of Mizoram (NGHAM) member-te an ni.

ZALEN zawhna chhangin NGHAM hruaitute chuan MUHCS an zawm theih loh chhan chu a rate vang a ni tih an sawi a. “Sawrkar hian rate hniam tak, chu pawh cashless ni bawkin inremna min ziahpui an tum a, hetiang rate hi chuan kan kal thei dawn si lo va. Chu chu kan harsatna ber a ni,” tiin an hruaitu pakhat chuan a sawi a. MUHCS chungchangah sawrkar lam nen chuan an inbe zeuh zeuh tih a sawi bawk.

Sawrkar nen an inrem theih loh dan sawiin NGHAM hruaitute chuan, “Vairam lama private hospital inremna an siampuite chu anmahni rate ang ang atanga 10% discount te, 15% discount-tein inremna an ziahpui deuh vek a, chu an discount hnua an rate-te chu Mizorama private hospital rate nena khaikhin chuan la sang far far hlawm tak a ni a. Keini pawhin kan rate awm sa hi min pawmsak mai turte in kan dawr a, a theih loh a, vairam lama discount an pek ang hian kan pe ve mai ang ti kan dawrna pawhin awmzia a nei em em chuang lo a. Kan duhnate min pawmpui theih hun hun hi MUHCS kan zawm ve theih hun tur chu a ni mai turah ka ngai,” tiin ZALEN zawhna an chhang.

MUHCS la zawm lote:

1) Ebenezer Hospital 

2) Aizawl Hospital 

3) LRM Hospital 

4) Care Hospital 

5) Adventist Hospital 

6) City Hospital 

7) Greenwood Hospital 

8) Trinity Hospital 

9) Rosewood Hospital 

10) Agape Hospital 

11) Alpha Hospital 

12) Nazareth Hospital, Kolasib