ZALEN May 24, 2026: Kum kalta, 2025-26 chhung khan Mizoramah HIV kai thar mi 1,628 hmuh a ni a, HIV kaina tam ber hi mipat hmeichhiatna atangin a ni.

Nikum 2025-26 chhung khan HIV kai thar hi 1,628 an awm bakah naupai lai HIV kai 104 hmuh a ni bawk a, heti hian nikum chhunga HIV positive hmuh zawng zawng chu 1,732 an ni.

Nikuma HIV hmuh tharte hi mipa 1,105 (63.8%) leh hmeichhia 627 (36.2%) te an ni a. HIV positive-te kaina tam ber chu mipat hmeichhiatna (sex) atangin a ni a, hemi atanga kai hi mipa 744 leh hmeichhia 474, an vaiin mi 1,218 niin hei hi nikum chhunga HIV kai zawng zawng atanga chhutin 74.82% a tling a ni.

Hriau thianghlim lo inhmantawm vanga HIV kai chu pahnihna niin mipa 338 leh hmeichhia 31, an vaiin mi 369-in an kai a. Hri kai zawng zawng atanga chhutin 22.67% an tling a. Nu atanga naupangin a kai hi 27 (1.66%) awmin kaina chhan hriat loh mi 14 (0.86%) an awm bawk.

HIV kai thar zingah hian nupui/pasal nei lai mi 576 (47.29%) an awm a, kawppui nei lem lo mi 542 (44.50%), mawngkawhur 79 (6.49%) leh hmeichhe inzuar (commercial partner) mi 21 (1.72%) an awm bawk.

HIV kai hmuhchhuah thar zinga a tam ber hi thalai, hnathawk thei rual an ni a. HIV hmuhchhuah zingah hian kum 25 atanga 34 inkar an tam ber a, mi 625 hmuh niin hei hi HIV hmuh thar zawng zawng atanga chhutin 38.39% a tling a. Kum 35 atanga 49 inkar chuan dawtin 508 (31.20%) an ni a, kum 15-24 inkar 332 (20.39), kum 50 chung lam 132 leh kum 14 hnuai lam 31 te an ni.

Mizoram State AIDS Control Society (MSACS) chhinchhiah danin kum 2009-10 atanga 2025-06 inkar chhung khan Mizoramah HIV hmuh chhuah mi 28,371 an awm a ni.