ZALEN March 15, 2026: Nikum chhung khan Aizawl City Traffic huam chhungah lirthei chetsualna tum 38 thlengin hemi kaihhnawihah hian thi 19 an awm.

ZALEN-in Aizawl City Traffic thawktute hnen atanga thu a dawn danin lirthei chetsualna thlengah hian thi mi 19 an awm bakah hliam tuar 21 an awm a. Chetsualna tum 38 thlengah hian hliam na tak tuar chetsualna tum ruk, hliam tenau tawrhna tum nga leh inhliam awm lohna tum riat a awm a ni. 

Chhinchhiah danin lirthei chetsualna hi darkar bi anga chhutin zan dar 6 atanga dar 9 inkarah thleng tam berin tum riat a thleng a, chhun dar 12 atanga tlai dar 3 leh dar 3 atanga tlai dar 6 inkarah tum ruk ve ve, zing dar 6 atanga dar 9 inkar leh zan dar 9 atanga dar 12 inkarah tum nga ve ve, zan dar 12 atanga zing dar 3 inkarah tum li, zing dar 9 atanga chhun dar 12 inkarah tum thum leh zing dar 3 atanga dar 6 inkarah tum khat a thleng a ni.

Nikum chhung vek khan Aizawl City Traffic huam chhungah hian lirthei dan bawhchhia man zat chu 9,799 a ni a, heng zingah hian two wheeler tam berin 7,116 man an ni a. Lirthei dan bawhchhia zawng zawng atanga chhutin two wheeler man zat hi 72.61% a tling a ni.

Two wheeler dawta dan bawhchhe tam ber chu LMV niin 1517 man a ni a, taxi 621, HMV 421, MMV 60, Bus 53 leh a dang 11 ten an dawt a ni. Nikum chhunga Aizawl City Traffic Police ten lirthei dan bawhchhia an man atanga sum an chawitir tlingkhawm hi a vaiin Rs. 92,87,300 a tling.

Lirthei dan bawhchhetuten an bawhchhiat zingah MV rules bawhchhiat vanga sum chawitir tam berin 3,181 man an ni a. A hmun lova lirthei dah vanga man 487 awmin a dawt a, no turning, no entry, wrong side, driving lecense tel lova khalh, obstruct follow leh thupek bawhchhia (disobey order) te chu a langsar zualte an ni.

Nikum chhung hian Traffic police hian December thlaah dan bawhchhia hi man hnem berin 1403 an man a, January thlaah man tlem berin 499 an man a ni.