ZALEN February 2, 2026: Transport Department Minister Vanlalhlana chuan chuan vawiin khan Directorate Conference Hall, Transport Department-ah Mizoram State Road Safety Council (MSRSC) buatsaih, Road Safety Month 2026 hawnna hun chu khuallian niin a hmanpui.

Khuallian Vanlalhlana chuan India ramah kumtin accident leh accident avanga thi leh hliam an pung a, a chhan bulpui ber, 70% vel chu lirthei khalh chak vang a ni, a ti a. A hmaa nileng tlana thlen theih hmunte kha rei lo teah thlen zung zung theih a nih tawh a; kawng a that tawh avang leh lirthei a tlan chak tawh avangin fimkhur a pawimawh a ni, a ti a. Nikum lama Mizorama lirthei chesual zat leh lirthei chetsualnaa thi leh hliam zat chu Accident 73; Thi 56; Inhliam 45 a nih thu a sawi.

Transport Department Director Er. R. Lalrammawia pawhin India rama accident a pun nasatzia sawiin, khawvel pumpuia lirthei awm 1% chu India rama mi a ni a, chutih rualin khawvel pumpuia lirthei chetsualna thleng 11% chu India rama thleng a ni, a ti. e-DAR atanga kum 5 kal ta chhunga India rama accident thlen dan average-a lakin kum khat chhungin accident 4,42,843 thleng ang a ni a, kum khat chhunga accident kaihhnawiha thi chu 1,62,183 niin, na taka hliam 4,21,769 an ni, tih a sawi bawk

Transport Director chuan kumtin India ramah lirthei accident avangin mi nuai 1 sing 6 chuang zet an thi thin a. An zinga 83% chu thalai hnathawk rual an ni a. Hei vang hian India-in a GDP 2.5%-3% hloh ziah ang a ni, a ti.