ZALEN October 27, 2025: Mizoram-ah a hmasa ber atan Territorial Army (Home & Hearth)-a tang turte lakna chu November ni 15, 2025 leh November ni 25, 2025 inkar hian Rajiv Gandhi Stadium, Aizawl-ah neih a ni dawn a. He hna lakna hi Mizoram Sawrkar leh 166 INF BN (TA) (H&H) Assam-te tangkawp chuan an buaipui dawn a, hmeichhia-te tan Territorial Army (Home & Hearth)-a an luh theihna tur a ni.

 Lt. Col. (Retd.) Clement Lalhmingthanga, MLA chuan a vawikhatna leh a hmasa ber atan Mizo nulate Territorial Army-a an luh theihna tur kawng hawn a ni a. India Sawrkar chuan hmeichhiate Armed Forces-a luhna tura hmalakna kalzelah tun tuma Territorial Army lak turah pawh hian post 144 General Duty lak turah post 9 chu hmechhiate tana hauhsak a nih thu a sawi.

Hetianga hmeichhiate Territorial Army-a an luhna tur atana bultanna hian hmeichhiate ram tana hna an thawhna te, mahni an inthununna te leh hruaitu nihna thinlung an neih te lanchhuahtirna tura ruahman a nih bakah Mizote kan khawtlanga hmeichhia dinhmun pawihmawhna leh hnam inlungrualna leh chakna atana hmeichhiate hnathawh lantirna tur atana ruahman a ni.

Territorial Army atana lakte chuan Indian Army uniform nen chhuanawm taka ram tana hnathawkin, India Army te angin hlawh leh hamthatna bakah damdawia inenkawlna te an dawng a. An hnathawh that dan leh mawmawh dana zirin Territorial Army te hi hun rei zawk atana chhawr theih leh hamthatna hrang hrang Sawrkar ruahman anga pekzui zel tur an ni.

Lt. Col. (Retd) Clement Lalhmingthanga, MLA, Chairman, State Level Committee on Territorial Army Coordination and Establishment chuan thalai te kutah Mizoram hmasawnna tur meichher chu awmin chu chuan India Hmarchhak Mizoram dinhmun tisangtu tur a nih thu a sawi a. Chumi atan chuan Territorial Army-a kan luh theihna huntha hi bawhpelh lo a, ram tana hna thawh theihna hna zahawm hi ngaihven turin Mizo thalaite a ngen a ni. Territorial Army (Home & Hearth) Assam Mizoram ngeia din hian ram venhimna atan a tangkai dawn bakah ram venghimtute leh Mizo mipuite inkarah inkungkaihna ti thatu tur a nih dawn thu a sawi bawk a. 

Lt. Col. (Retd) Clement Lalhmingthanga, MLA, chuan Mizo Territorial Army Companies chu Aizawl-ah din tawh niin anni hian District thuneitute nen tangkawpin Mizo thalaite tan a thlawnin he hna lak tur atana inbuatsaihna hi an kalpui a. Mizo thalaite he hun remchang hi chhawr tanglai turin a ngen a, Territorial Army-a an luh ngei theihna tura inpuahchah turin a ngen bawk a ni.

66 Infantry Battalion (TA) (H&H) Assam chuan Mizoram Sawrkarin theihtawp chhuaha a thlawpna leh tanpuina zarah Territorial Army lakna hi langtlang, dik leh felfai taka kapui a, Mizo thalaite tan hna tha leh zahawm ram tana huaisen leh zahawm taka hna an thawh theihna tur hi zawmtir ngei an tum a ni.