ZALEN May 20, 2026: Health & Family Welfare Department changtu Minister Lalrinpuii chuan vawiin khan mipuite tana healthcare service leh sawrkar hnathawh tihchak na tur, Online Medical Referral chu SAD Conference Hall, MINECO-ah a tlangzarh.

Lalrinpuii chuan Online-a Medical refer awlsam taka Health & Family Department hnuaia tih theih a ni ta mai chu lawmawm a tih thu a sawi a. Tunlai khawvel thiamna (digital) hmangin MUHCS online registration pawh awlsam taka tih theih a nih thu sawiin, tun dinhmunah chhungkaw 46,000 chuang an in-register tawh thu a sawi bawk.

Mizoram Sawrkar hian damlo enkawlna kawnga harsatna awm te zirchiangin, siamthat dan tur, Damlo na tak, Mizoram pawna enkawl ngai te tan referral kalphung, awlsam zawk leh mipuite tana rang zawka tih dan tur a ngaihtuah a. Damlo phaia refer a bik takin, Aizawl District pawna awm te tan, hun khawh ral lo leh an refer-na hmun rang taka an thlen theih nan, Directorate of Hospital & Medical Education (DHME) leh Mizoram State e-Governance Society (MSeGS) te tangkawpin Online Referral System hi an rawn duang chhuak tih sawrkar thuchhuah chuan a tarlang.

Medical Referral Board hi tun dinhmunah, Aizawl leh Lunglei-ah chiah a awm a, Medical Referral Board-in a recommend te chu an thawhna Department atanga Forwarding lehkha nen DHME-ah provisional permission dil a ngai thin a. Hei hi damlo tan a buaithlakin, hun tam tak khawh ral thin a ni.

Tunah chuan District Hospital tinah District Screening Committee (DSC) din ni tawhin, phaia damlo refer ngai te an awmna district DSC te’n lo zirchiangin, Medical Referral Board (Aizawl & Lunglei)-te nen video conferencing hmangin recommendation an siam tawh ang a; chu recommendation chu DHME-ah kal kher ngai lovin, phone emaw personal computer emaw atangin link -medicalreferralmizoram.in ah lutin online hmanga permission hi cheng 20 chawiin dil tur a ni.

He Online Referral Portal hi Sawrkar hnathawk-te tana siam a ni a, an department thawhna atanga forwarding letter leh board lehkha nen upload mai tur a ni. Provisional permission nen hian, Mizoram State Health Care Society (MSHCS)-ah in-report leh tur a ni. Sawrkar hnathawk nilo (MUHCS beneficiaries - General) te chu MUHCS-ah medical board lehkha nen in-report tur a ni thung. Final permission hi document enfel a ngaih avangin, DHME-ah damlo emaw an chhungte emaw office hun chhunga kalin lak chhuah theih a ni ang. 

Harsatna nei chuan office hunchhungin phone no. 6909319420 ah hian biak pawh theih reng a ni.