ZALEN May 8, 2025 : Operation Sindoor hnuaia India-in tum 24 lai Pakistan leh Pakistan awp chin Pakistan a kah khan, Sipai hmunpui kah tumna a awm lo. Amaerawchu Islamabad chuan India ram hmar lam leh khawthlang lama India sipai hmun te a kah avangin India chuan air defence radar leh hmun engemaw zat a kap a, Lahore pawh chung zingah chuan a tel.

NDTV-in a tarlan danin Sawrkar thuchhuak chuan Nilaini zinga Operation Sindoor airstrike an neih chu Lasker-e-Taiba leh Jaih-e-Mohammed te hmun chhutchhiat chiah a nih thu an tarlang a, tum bik neia fimkhur taka chet a ni an ti. Pakistan sipai hmun kah tumna a awm lo a, India sipai hmun beih a nih chuan chhanletna pek nghal a nih tur thu pawh an tarlang tel a ni.

Nizan khan Pakistan chuan India sipai hmun thenkhat, Awantipura, Srinagar, Jammu, Pathankot, Amritsar, Kapurthala, Jalandhar, Ludhiana, Adampur, Bhatinda, Chandigarh, Nal, Phalodi, Uttarlai leh Bhuj te chu drones leh missiles hmangin an bei a ni.

Sawrkar thuchhuak chuan, "Heng inbeihna te hi Inegrated Counter UAS Grid leh Air Defence system hmangin kah thlak vek an ni. He inbeihna sulhnu hmuhchhuah te hian Pakistan hian min rawn bei ngei a ni tih a tichiang a ni," a ti.

Sawi lawk ang ngeiin India chuan vawiin khan Pakistan-a air defence system an bitum chat. "Tukin zing atanga khan Indian Armed Force te chuan Air Defence Radar leh system Pakistan hmun hrang hranga mi an bitum. India in a chhanletna hi Pakistan thil tumna nen danglamna a awm lo. Lahore a Air Defence system phei chu hnathawk thei lova tihchhiat a ni," tiin sawrkar thuchhuak chuan a tarlang.

Pakistan hian Line of Control atangin silai hmangin Jammu and kashmi-a hmun hrang hrang, Kupwara, Baramulla, Uri, Poonch, Mendhar leh Rajouri sector te a kap niin sawi a ni. Sawrkar thuchhuak chuan, "Pawisawi lo mi 16 ten nunna an chan a, heng zingah hian hmeichhe pathum leh naupang panga chu Pakistani silai kah vang hian an thi a ni. Hetah hian India chuan Mortar leh Artillery hmangin Pakistan hi a chhang let a, inkahna hi a reh phah. Indian Armed Force chu tum bik neia fimkhur taka che an ni a, hei hi Pakistani sipai te pawh hian an zah ngei kan beisei," a ti.