ZALEN June 29, 2026: ZPM General Headquarters chuan vawiin khan party office-ah chhung inkhawm an nei a, he huna thusawitu Chief Minister Lalduhoma chuan people’s movement an nih angin; mipuite pawh tunhma sawrkar ai chuan anmahni-ah an inti neitu a, chuvangin mipuite chu dah pawimawh tur a nih thu a sawi.

Lalduhoma chuan Pathian hnenah hian rei tak Chief Minister nihna chanvo chelh tir turin a dil ngai loh thu a sawi a, ‘Kei aia tha zawk, tisa leh thlarau lama chak zawk min pe rawh,’ tiin ka dil thin,” a ti a. Hruaitu nih hi a chuha chuh chi a ni lo, amahin a lo piang mai. An party chuan danglam bikna, Val upa Council an nei a, anni hi Chief Minister tur ruattu an nih thu a sawi bawk.

Chief Minister chuan term chanve an lo sawrkar ta a, mi tam tak ngaihdanah chuan Minister te hna chanpual thlakthlengna lian tak thleng turah an ngai a. Minister te an thawkrim a, an department chan te an bel dawn chauh a, tun dinhmunah chuan major reshuffle ngai an tih loh thu a sawi. Central atanga thiltih ngai ang chi te leh department inhne rem deuh tur te chu tih danglam, minor reshuffle hi vawi 10 dawn lai annei ve tawh a, a boruak azir zelin kalpui chhoh a ni ang, a ti.

Duhoma chuan kum tam tak an policy an lo vahvaihpui tawh a, party mite thawhrimna leh mipui te avanga sawrkar an chang a. Mizoram mipui nawlpuiin duhsakin an tawngtaipui a, an duhsakna hlan vanga sawrkarkan ni tih theihnghilh tur a ni lo, a ti. An Party hmingah pawh People’s Movement a nih angin, mipui nawlpui pen rual zela kal tur, mipui te pawhin tunhma sawrkar ai khan anmahni-ah an inti neitu em em a, chuvangin mipui dah pawimawh hle tur a ni, a ti.

Chief Minister chuan Sawrkar that leh that lohah tehfung chu thil pawimawh tak a nih thu sawiin, mi a thil dil a hlawhtlin chiah loh avanga sawrkar sawisel chiam mai te, mimal duh dan leh hamthatna atanga thil teh anih chuan sawrkar chu tehtlin a har ang a ti a. Sawrkar tha tehna tur chu an auhla an umzui em?, MLA te hnathawh a tha tawk em? tih te a ni.

Bible-a Joshua chanchin sawiin Israel hnam 12 te angin Minister 12 an nei a, kum hnih leh a chanve chhung ram an la tawh, an thlen chin lungawithlak viau mah se, ram lak tur an la ngah hle a ti. Minister te hian an chanpual department theuhah ram lak tur hmachhawp an la ngah viau a. Corruption lakah te, System chhe lutuk lakah te, hnathawh quality chhe lutuk lakah te ram lak tur an la ngah a. Chawl thei an la ni loh loh thu Duhoma chuan a sawi. “Kei ngei pawh hi upat lam pan ka lo ni ve ta a, in mi duhsakna azarah pa ber dinhmun ka chang a, hemi chanvo ka chelh chhung hi chuan a tam thei ang ber ram lakpui che u ka tum a ni,” a ti a.

India raminn kum 2047-ah Independent a nih kum 100-na an thlen turah Prime Minister chuan hmathlir, Vikshit Bharat 2047 a nei a. Chu mi lam pan chuan state tin an inbuatsaih a, Mizoram pawhin Vikshit Mizoram 2047 a duang a, chuta target pakhat chu India ram GDP-ah Mizoram hian 1% tal thawh ve tum a ni," a ti. Lalduhoma chuan, "Kum 2047 ah chuan keini chu kan awm tawh dawn lo, heng hun a thlen hunah chuan nakin hun atana vawiina kan hmathlir chhawpchhuah te hi thangthar ten an la chhawr dawn a ni," a ti.

Chhung inkhawm hi KC Lallianmawia, General Secretary in a kaihruai a; Rev. Dr. C. Vanlaldika chuan hunserh a hmang a ni.