ZALEN Feb 12, 2026: Serchhip District Commission chuan MIZOFED Serchhip chu, Consumer ten Gas an lak tha lo an thleng sak loh avangin pawisa chawi tur leh Gas hi thleng sak turin thuremna a siam sak.

Lenkawl in a tarlan danin tun thla, February ni 10, 2026 khan Serchhip District Commission chuan Consumer Court Case No. 9 of 2025-ah thuremna tichhuakin, he thubuaiah hian Serchhip District chhung Mualcheng khuaa cheng Romawia Hauhnar chuan April ni 10, 2025-a eirawngbawlna Gas a lak chu a that loh avangin Mizofed, Serchhip-ah a report a, Mizofed lam hian an thleng sak loh avangin Romawia Hauhnar hi Consumers Court-ah zualko in thubuai ngaihtuah a ni ta a ni.

He thubuai ngaihtuahtu Consumer Court tia hriat thin, Serchhip District Commission chuan tun thla ni 10 khan thuremna tichhuakin Mizofed Serchhip chu Gas Cyinder tha lo hi Order a chhuah atanga ni 30 chhunga thleng turin a ti a, hei bakah hian Consumer rilru an tih hah avang leh Consumer te harsatna nasa tak an thlen avanga Consumer in Court-a a chanvo humhalh tura a senso phuruk nan Rs. 5,000/- chawi turin a ti bawk a ni.

#ZalenNews