ZALEN July 04, 2026 : Lirthei hmanga eizawng pawl pathumte chuan tun hnaia hman thar, Mizotaxi Application chu high court-ah an khing dawn.

Mizoram Taxi Association (MTA), Aizawl Two Wheeler Taxi Association (ATTA) leh Aizawl District Auto Rickshaw Owners’ Association (ADAROA) office bearer theuhte Inrinnia thukhawm chuan he thutlukna hi an siam a ni.

Mizotaxi App-a inziak lutte tan hian insurance a awm loh avang leh chhan hrang hrang avangin an khing dawn tih taxi pawl hruaitu pakhat chuan ZALEN a hrilh.

A hma pawhin taxi leh autorickshaw pawl hruaitute hian mipuiin an awmhmun atanga an koh theihna leh chuan man hriat sa theihna app hi tha lo an tih thu leh chuan man hi State Transport Authority (STA)-in kum 2024 daih tawha a siam rin tur a nih avangin an hlawk dawn lo tih an lo sawi tawh bawk.

App hi Nilaini khan Transport Minister Vanlalhlana’n tlangzarhin hman tan nghal a ni a, tlangzarh hma ni thleng khan lirthei 974 inziak lut an awm tawh a ni.