Aizawl; Kum 2009 -2012 inkar chhung khan Mizoram Police Headquarters chuan tender ko lovin hna 104, Rs. vaibelchhe 15.16 hu chu mi hrang hrang hnenah a pe niin Comptroller & Auditor General Report chuan a tarlang. July 9,2014 (Nilaini) a Mizoram Lagislative Assembly Session a pharh tak CAG report tarlan danin heng hna Police Headquarters in a pek te hi in sak, santiri (duty) post siam, check gate siam, thawktu chenna in sak, barrack siam leh khelmual laih hna te a ni a. Dan dinglai ah chuan hna hmanhmawh bik ah chuan tender ko lovin hna pek theih tih a ni a, mahse CAG report chuan heng hna pek te hi engmah hman-hmawh bik (urgent work) a awm lo niin a tarlang. CAG report chuan PHQ a DDO (Drawing & Disbursing Officer) chuan pawisa luanral (lapse) hlauh vangin vaibelchhe 13.04 chu a lachhuak niin a tarlang bawk a, hei hi dan diklo leh phal bak chin pawisa kawl a ni, a ti a. DGP, IGP, District SP, Commandant, PTC Principal te leh Forensic Science Laboratory te chuan phal bak aia sang stationery bungrua an lei bakah lirthei enkawl nan phal bak sum an hmang niin a sawi bawk. CAG report chuan Mizoram Police chu ralthuam an nei tlem hle niin a tarlang bawk a. Training lam pawh an tlachham tih sawiin Police force ah hmeichhia an tlem tih a sawi bawk a, hetih lai hian national average ngaihtuahin sual (crime rate) ah Mizoram chu a hniam hle niin a tarlang thung.