ZALEN May 25, 2026: Vawiina ZPM Chhung Inkhawma thusawitu Home, UD&PA Minister K. Sapdanga chuan, “Police tiang keng chi (MRP) 150 leh silai keng chi (Armed Police) 200, a vaiin 350, kum hmasaa fair taka kan lak ang khan kan la leh dawn a. Mizoram Home Guard lakna turin advertisement tih chhuah tawh a ni a, hmeichhe quota a khah tawh avangin mipa tan chauh a ni rih ang,” a ti. 

Police leh Home Guard lak dan tur chungchang hi sawi zauin Sapa chuan, ‘‘Matric Pass chin, mi chak, discipline tha, mi 94, fair takin lak kan tum a. Physical Efficiency Test leh Interview a awm ang a, mark a pu ve ve ang. Duhsak zawng nei chuan exercise lak lamah lo tanpui tur. Pressure vang ngawt chuan tlin a harsa ang, insawipui a tangkai vak lo ang. Danin a sawi angin MRHG hi kum 3 atan lak a ni ang a, extend/terminate theih a ni. A tul huna ral do thei tur, VIP Guard, Bank or House Guard, tui tla char leh kang thelh te ti thei tur mi chak tha kan duh. MRHG train chhuak chu sawrkar/private-ah Multi-Tasking Staff atan an rintlak ang. MRHG hi Behaviour Training Centre-ah siam kan tum a, Institution zahawm taka siam kan tum. Training Centre pawh kan nei tha tawk hle a ni,’’ a ti.

Home Minister chuan Police lak a ni leh dawn tih sawiin, ‘’Kan sawrkarin Home department min phalsak angin Police Tiang keng chi 150 leh Silai keng chi 200, a vaiin 350 lak leh kan tum. Nikumah fair takin lak a ni a, kan zawngchhang. A fair leh hle ang. Physical Efficiency Test, Written exam leh Interview a awm leh ang. Heng inelna chi thum hi mark puttir vek tum a ni. Silai pu tura saptawng thiam kawngro suttir lutuk kha a awm tawh lo ang. Sawrkar thupek angin exam zawhna chu MPSC-in siamin a endik leh ang. Nikuma lak 259-te kha an kawng kal dan atang ringawt pawhin an training tha tih a lang. Training chhungin ruih theih thila buai an awm lo. Mizoram Police te Fitness-ah leh Discipline-ah tan kan la zual zel ang,’’ a ti bawk.

UD&PA Minister chuan, ‘’Mission Urban Drain (MUD) kalpui turah consultancy firm ruaiin survey zawh tawh a ni a. MLA bial tin huamin hmun 44-ah hmalakna hna thawh tum a ni. Leimin Mual tawlh laka khawpui chhanna atan Cheng Vbc. 35 neiin bul kan tan leh mek. Aizawl khawpuiah hma lak hmasak a ni dawn a, district khawpui dangah pawh hma kan la ang,’’ a ti a. ‘

‘’Drain lian cover inkalpawhna atan (local connectivity) Aizawl MLA-te leh Corporator-te an local development fund tuiluankawr siam nan hmang uar turin kan ngen. An bial leimin laka veng turin, an mi duhsakte tho thawhtirin drain lo siam se kan ti a ni. Kum 2033-ah zawh vek kan beisei. Khawpui him nan 2028-ah kan sawrkar leh a ngai a ni,’’ a ti bawk.