ZALEN June 24, 2026: Chief Minister Lalduhoma chuan policy chungchang chu political party te inbeih chiam chiamna tur nia a hriat loh thu a sawi a, MNF founder president Pu Laldenga pawhin independent duhin zalenna a sual a, a hnuah inremna siam turin thutlukna a siam leh mai a ni, a ti.

CM Conference Hall-a vawiina chanchinbumite nen an inkawmnaah Lalduhoma chuan, "Hmana kan duh kha tunah kan duh tawh lo a ni mai a, hmana tha kha tunah a tha tawh lo thei. Tha tur nia hriat kha thil kha tih hleih theih loh te a lo ni a, chuvangin hetiang hi inbeihna tur chi niiin ka hre lo," a ti.

Chief Minister chuan entirna sawiin, "Pu Laldenga pawh khan a tirah chuan independent hmuh theih beiseiin zalenna a sual a, mahse, hun an kal a, sual chhuah chi a ni lo tih a hria a, thutlukna huaisen tak siamin inremna ziah a ni. Pu Denga kha mi huaisen ni lo se khatiang thutlukna kha a siam lo ang, zalenna sual tura chhuak khan thui tak a thlir a, a policy kha a thlak mai a ni. Kei chuan Pu Denga kha a tlawm ka ti ve ngai lo. A policy kha thlak lo se Mizoram hian eng angin nge kan tawrh ang tih pawh a hriat loh a ni," a ti.

CM-in car pakhat bak neih tul a tih loh thu a sawi chungchangah Lalduhoma chuan, CM tan hian spare car neih kha tul a lo tul si a, pakhat aia tam kha duh vang ni lovin a ken tel a nih miau avangin pakhat aia tam neih a ngai a, sawi sawi chi pawh nia a hriat loh thu a sawi bawk.