ZALEN, July 25, 2026: Thalaiten ezam zawhna put avanga a bân an phut, Indian Education Minister Dharmendra Pradhan chuan bânna a thehlut ta a. A bân phutna kaihruaitu, Cockroach Janta Party (CJP) chuan, “Kan hlen ta, mipui rorelnain hnehna a chang,” an ti.

Pradhan-a hian Inrinni chawhnu her hret khan a bân thu hi X-ah a tar lang a. A hma lawkin amah duh lotute leh police chu New Delhi-ah an innawr leh hman a, CJP leh sorkar hotu liante an inbiak leh hma lawkin a bâng tih hi puan a ni.

“Jantar Mantar leh ram chhung hmun dang boruak thlirin, he hun remchang hi ram dotuten an hman tangkai loh nan… Prime Minister (Narendra Modi) hnenah ka bânna lehkha ka thehlut,” a ti.

“Kan thalaite duhna, an ngaihtuah leh an hmathlir hi ka zah em em a ni,” a ti bawk.

Pradhan-a hian zirlai sang telin amah bân an phutna chu ‘ram dotuten’ remchanga an hman a phal lo tih a sawi a. Zirlaite chu zirlai leh an hma lam hun tur an buaipui bak thil danga pawh pen rem a ti lo tih a sawi bawk.

CJP dintu, Abhijeet Dipke-a chuan New Delhi-a an punkhawmna hmun, Jantar Mantar-a awm khawmte hnenah, “Kan puitlin ta,” tiin union minister-in a bânna a thehluh rualin a sawi.

Internet leh metro station 18 zet an tihtawpna hmuna pun khawmte hi lawmin an au nasa hle a. Khawpui dangah pawh Pradhan-a a bân avanga lawma phusa an tam hle bawk.

X-ah CJP chuan, “Cockroach-te kan chak… mipui rorelnain hnehna a chang!” tih an tar lang bawk.

CJP hian an thil phut dang - NEET-UG zawhna put avanga exam that leh ngaih vanga zirlai intihlumte zangnadawmna Rs. Vaibelchhe 1 zel pek, lungawi loh an lantirnaa telte laka hremna pek theih hlihsak leh Delhi Police leh Rapid Action Force paramilitary-ten kut an thlak vanga vantlang hmaa ngaihdam dil an phutte chu ngaihsak a la hlawh lo tih an sawi.

Sorkar leh CJP chu Inrinni tlaia inbe leh tur an ni a, an kaltlangpui dawn em tih he chanchin ziah lai hian a la hriat loh va, Zirtawpni tlai khan an lo inbe tawh a ni.