ZALEN May 15, 2026: Prime Minister Narendra Modi-a'n Asia khawthlang lam buaina avanga Oil-a harsatna a awm chhoh zel avangin amah vengtu Special Protection Group (SPG) hnenah a convoy car te 50% a ti tlem tura a ti chuan sawi a hlawh a, amah zuitute hman turin electric vehicles engemaw zat telh tura ruahman a ni a, mahse, pawisa hman belh zawng chuan hmalak tum a ni lo.

SPG te chuan he thurawn an hmu hi an zawm nghal a, security kalphung erawh tih danglam a ni lo. Pathianni-a Hyderabad a zin tum pawh khan Prime minister hian mipuite chu tuialhthei leh rangkachak sum seng tlem turin a ngen a ni.

PM Modi-a'n a convoy car pahnih-a a tih tlem hnuah hian Chief Minister thenkhat pawhin a tih dan hi an entawn a, hetihlai hian BJP hruaitu zingami MLA Preetam Singh Lodhi-a'n a convoy-ah mi tam tak a la inzui tir chuan sawi a hlawh hle.

Prime Minister Narendra Modi berin inrenchemna a kalpui takah hian Delhi Chief Minister Rekha Gupta chuan Delhi sawrkar hnathawk te chu kar khatah chhungin ni hnih tal In atanga hnathawk (work from home (WFH) turin an ti a, West Asia buiana avanga hian official te petrol dawn thin pawh litre 200 atangin 20%-in an tih hniam sak a, private sector lam pawh hemi zawm tur hian an ngen bawk. 

Delhi sawrkar chuan Thawhtanni apiangin minister leh sawrkar hnathawkte chu 'Metro Monday' hmang turin an ti a, public transport hmang turin an ngen.

Tuialhthei remchem nan hian office kai hun pawh an sawn a, peak hour laia traffic tawt lutuk tih ziaawm nan Delhi sawrkar hnathawkte chu zing dar 10:30 ah tan a, 7 pm. ah ban tur a ni. Municipal Corporation of Delhi (MCD) erawh a ngaiin 8:30 am - 5 pm a ni ang.

Chief Minister chuan Delhi a cheng te chu kar khata 'No Vehicle Day' vawi khat tal hmang turin a ti. Bungrua pawh a tam thei ang ber Rel-a phurh a nih theih nan hmalak a ni bawk.

Hetihlai hian NCP Chief Sharad Pawar chuan Prime Minister Modi chu tuialhthei avanga harsatna hrang hrang India ramin a tawh mekah All party Meet ko turin a nawr ve mek bawk.