ZALEN May 8, 2026 : Mizoram Independent School Association (MISA) chuan MBSE-in kumin HSLC leh HSSLC result a tihchhuah dana, Merit List, Subject Topper, Letter hmuh zat leh division a rawn tilang ta lo hian Mizoram mipui a barakhaih a, zirlaite tana rualelna (competition) tha tak a nuai bo tur hi Matric leh Class XII zirlaite tan a pawi an ti a. Matric Result chhuak boruak huhang sang tak ni tha kha a reh ta ruih mai a ni, an ti.

Mimal result nei tha leh sikul result nei tha te tarlan ni thin chu rawn thai bovin, ang khat vekin a rawn hrut rual ta a. Deficit school, Private school leh Sawrkar school te, ngawrh tak leh taima taka zirna kalpui thin te leh a lehlamah inthlahdah taka zirna kalpui tute nen ang khat vekin result a rawn hrut rual ta mi hi standard tlak hniamna an ngai bawk. Inelna sang tak hmanga zirna quality sang tak kan lo neih thin chu inelna awm lovin a tlu sawp dawn an tih loh theih lo, an ti.

MISA te chuan CCE Pattern pawl hniam lama kalpui chuan elementary education a sawpchhe hneh hle an ti a, hei hi a chhan chu CCE hian No Detention a ken tel vang a ni. Mizo naupangin pawl 1 atanga pawl 8 thlengin a Fail theih loh tih hian an rilru a ti hniam a, an thahnem ngaihna, taimakna leh tih hram hramna awm thin kha a nuaibo ta hi thil pawi tak a ni, an ti. Hetiang anih tawh nak a laia HSLC/HSSLC-a competition awm thin paih bova a hniam zawnga tl a, result chipchiar lo tak chhuah hian Zofate zirna nasa takin a pawt hniam dawn tih a chiang em em a ni, an ti.

MBSE leh sawrkar lama a changtu minister tem result chhuah dan an thlak danglam chhan an sawi, By-heart system nuai bo duhna te, Zirlai exam turte rilru hah lova exam tir an duh vang, ICSE leh CBSE te pawhin reult an tih chhuah hi merit list an tichhuak ngai lo tih an sawi te hi thil awmze nei ril lo tak a ni an ti. MISA chuan tuna result tichhuah dan hian by-heart system a tibo dawn chuang lo. Tuna result tihchhuah dan hian zirlai exam turte rilru a tih hahdam phah a rin awm loh. Exam pressure hi tihbo theih a ni lova, eng level-ah pawh exam pressure hi chu a awm reng dawn tih hriat a tha. Kuminah pawh candidate 43,00,000 nei CBSE tan hian Merit List chhuah theih a ni lo a, MBSE exam hi CBSE/ICSE te nen hian a inang lo hrim hrim a, an tan chuan merit list siam hi a rem ve lo a ni, an ti bawk.

MISA chuan Mizo naupangte sukthlek enin result puan dan thar hian naupang tam takah inthlahdahna leh rual el tawk lohna a thlen thei dawn. Zirlai naupang thiam thei tak tak leh tum sang tak neite a tihnual ngei dawn ni a lang hi a pawi hle a ni, an ti bawk.