ZALEN, Sept. 07, 2026: Mizoram Labour Link LPS Pro Fight fixture tihchhuah a ni a, a tan zanah inhnek vawi 10 awmin comedian lawm hlawh, Lalremthanga Hmar a inlan nghal dawn a, Khamsuana nen a tawpberah an inhnek ang.

October 16-ah Title Fight hmangin hmawrbawk a ni ang.

Thawhlehni zan dar 8-ah LPS Arena, Falkland, Aizawlah tan a ni dawn a, weight hrang pangaah inhnek a awm vek dawn a, fly-ah inhnek vawi thum awmin a hnuhnung berah ngaihven hlawh leh Comedian Search-a boruak nei tak, Sakawrdai boxer Remthanga leh Khamsuana, Khawkawn an innuai dawn a, a hmain N Lalhruaizela, Tawipui South leh Johan Lalrindika, ITI Veng leh Jacob Lalduhsaka, Chawntlangpui) leh Vanlalpeka,Sihfa an inhmachhawn bawk ang.

Bantam-ah inhnek vawi hnih awmin a hawn zanah hian Lalnunpuia, Rangvamual leh Joseph L Romalsawma, Bualpui NG an intawng hmasa ber dawn a. Rosangliana, Tlangsam leh C Lalruatfela, Tuirial an inhnek chhunzawm ve leh ang.

Light-ah inhnek vawi hnih tho awmin Israel Thangliana, Vanhne leh Raymond Lalenkawla,Melriat leh Remruatsanga, Kawrtethawveng leh Joseph Lalchawimawia, Saron Veng an inhmachhawn dawn a. Welter-ah Vanlalhruaimawia, ITI Veng leh Ramhmingthanga Zote, Bairabi leh VL Remruatfela, Mamit leh VMS Tluanga, Dinthar intawng ve lehin weight rit ber, middle-ah inhnek pakhat a awm dawn a, Vanlalsanga, Suangpuilawn leh Vanlaldika, East Phaileng an innuai dawn a ni.

A tir zan thum chhung, Thawhlehni atanga Ningani zan thlengin a hmunah man chawi lovin a duh apiang tan en theih a ni dawn a, zan lina, Zirtawpni zan atangin a hmuna en tur tan ticket hralh chhuah a ni dawn a, pakhat Rs 50-in a lei theih ang.

LPS 1-ah inhnek zawng zawng live-a pek chhuah vek a ni dawn a, LPS YouTube channel-ah member tan live-in a en theih dawn bawk a, Rs 179-in member a nih theih a, hei hian championship chhung a huam dawn a ni.

Pro Fight vawi 12-naah hian boxer 278 telin inhnek vawi 273 a awm dawn a, a tir atanga round of 16 thlengin round thum an khel ang a, quarterfinal atanga title fight thlengin round li a ni ve thung ang a. Weight tinah sulhnu leh tawn hriat nei thate seed pek an ni a, fly, bantam leh light-ah seeded boxer pariat theuh awmin welter leh middle-ah pali ve ve an awm a, anni hi round of 16 atangin an inlan tan dawn a ni.

Zan hmasa ber atanga title fight thlengin inhnek zan apiangin Orient Goldsmith Fighter of the Night lawmman sem thin a ni ang.