ZALEN, Sept. 25, 2026: Middleweight title lak kir leh tuma a inlan hmasak berah C Lalhruaitluanga’n Vanlalsanga a knockout a, Ningani zan Mizoram Labour Link LPS Pro Fight-ah Israel Thangliana’n lightweight round of 16 a lut bawk.

Bul a tannaah Chawngtlai boxer-in harsatna a tawk lo va, inhnek hnuhnung ber, middleweight-ah round hnih hmang zo lovin a chak.

Round hmasa berah Suangpuilawn rawlthar, Sanga ding tluan thei mah se Hruaia’n a taksaah na takin a hnek hnem a, a hnuah a lu leh a taksaah vawi li hnek zawnin Sanga a tlu a, round hnihna minute hnih leh second 26-ah knockout-in a chak.

Kum 29 mi, Hruaia hi kum 2022 khan welterweight-ah a champion a, middle-ah insawnin kum 2023-ah a champion zui leh nghal a; mahse, Pro Fight hnuhnung ber, kum 2024 khan title fight-ah F Lalthanliana Junior hneh lovin champion kawnghren a hloh va, lak kir leh tumin quarterfinal a lut.

LPS Arena, Falkland-ah inhnek vawi 11 a awm a, lightweight-ah R Vanhne boxer Israel-a’n boxing tha tak lantirin Saron Veng boxer tlo tak, Joseph Lalchawimawia lakah unanimous decision-in a chak a, seeded boxer hmachhawn zui turin round of 16 a lut.

Kum 18 mi, Israel-a hian inelna sang pangngai takah inhnek thununin fuh tak takin Joseph-a a hnek a, vawi thum a chak zawnna niin Orient Goldsmith Fighter of the Night lawmman dawngin fiahna tling inhnek a hmachhawn zui dawn a, Thawhlehni zanah seed sang ber leh welterweight champion lai, Lallawmawma, Tuipui nen quarterfinal luh an inchuh dawn.

Light inhnek dangah Tuipui Ferry boxer LV Robert Lalengliana’n thiamna nei zawk a nihna chhawrin Thangboi, Churachandpur, Manipur lakah round thum a la vek a, ban sei zawk a nihna thiam taka a hman bakah a hnek hneh tluan a, round of 16 lutin seeded boxer zinga mi, Micky Lalbiakzuala, New Vervek nen Thawhlehni zanah an intawng zui ang.

Fly-ah Selesih tlangval, Benjamin Lalrindika’n technical knockout-in hnehna a chang zawn a, round hnihna tawp dawnah Lalzuimawia, Champhai Zotlang lakah a chak a ni.

Quarterfinal lut tawh, Didika hian a hmain harsa lo takin Vanlalremsanga, Dulte a hnek tlawm tawh a, Zuimawia hmaah pawh chungnung takin a inlan leh a, a inhnek tawhah a beih tawk a la tawng lo.

Thawhtanni zanah a theihna chiang zawka lantir thei turin Kapzalawma, Vaikhawtlang nen inhmachhawnin round of 16 luh an inchuh dawn a ni.

Fly inhnek dangah Rangvamual boxer Alfred Lalrinsiama’n round hnihna atangin Seigoulal, Churachandpur, Manipur lakah tha takin a khel tluan a, a tir lamah che tha tawk lo mah se judge pathumin 29-28 vekin an chaktir a; Maubawk rawlthar Lalhriatzela’n Moses Lawmkimthanga (Nghalchawm) lakah inhnek awpbet ve thungin round tin a la vek a ni.

Bantam-ah Thang Biak Dik chuan round hnuhnung berah harsatna tawkin Sangau tlangval, Lorry Vanlalduatpuia’n nawr hneh viau mah se split decision-in a chak hram a. Round hmasa pahnihah Lamka, Manipur boxer hian dik leh dak tha takin a hnek fo va, inhnehtawk taka round thum an inbeih hnuah judge pahnihin an chaktir a, pakhatin Duatpuia a chaktir ve thung.

West Lungdar boxer Lalchhuanawma’n C Lalhriatpuia, Mission Vengthlang lakah thiamna leh theihna nei zawk a nih lantirin unanimous decision-in a chak a; Rangvamual tlangval, Vanlallawma’n Malsawmzuala, Maubawk lakah inhnek thunun hneh bik lo mah se split decision-in a tlang a, judge pahnihin 29-28-a an chaktir laiin pakhatin 29-28 thovin lehlam a pe tam zawk.

Welter-ah Phainuam boxer John Lalhunlawma’n round of 16 a lut a, tlo leh fei taka khel tluanin split decision-in Tyson Vanlalhruaimawia, ITI Veng a hneh a. Round hnihna thlengin an inhnek tawk hle a, round thumnaah John-a’n thahrui leh tharum a neih that hmangin a nawr hneh a, a hnek chhuak hnem zawk hle bawk a, judge pahnih point pekah 29-28-in a sang a, judge pakhatin 29-28 thovin ITI beisei Tyson-a a chaktir a ni. 

Inhnek dangah Dinthar boxer Ricky Malsawmzela’n C Lalrinhlua, Sairang Sihhmui lakah round thum la vekin hnehna a chang bawk.

Mizoram Labour Link LPS Pro Fight 2026

Zan 14-na : September 24, 2026 (Ningani)

RESULT

FLYWEIGHT

Benjamin Lalrindika (Selesih) def Lalzuimawia (Champhai Zotlang)

= Technical Knockout (Round 2, Minute 2:50)

Alfred Lalrinsiama (Rangvamual) def Seigoulal (Churachandpur, Manipur)

= Unanimous Decision (29-28, 29-28, 29-28)

Lalhriatzela (Maubawk) def Moses Lawmkimthanga (Nghalchawm)

= Unanimous Decision (30-27, 30-27, 30-27)

BANTAMWEIGHT

Thang Biak Dik (Lamka, Manipur) def Lorry Vanlalduatpuia (Sangau)

= Split Decision (29-28, 28-29, 30-27)

Lalchhuanawma (West Lungdar) def C Lalhriatpuia (Mission Vengthlang)

= Unanimous Decision (30-27, 29-28, 30-27)

Vanlallawma (Rangvamual) def Malsawmzuala (Maubawk)

= Split Decision (28-29, 29-28, 29-28)

LIGHTWEIGHT

Israel Thangliana (R Vanhne) def Joseph Lalchawimawia (Saron Veng)

= Unanimous Decision (29-28, 30-27, 30-27)

LV Robert Lalengliana (Tuipui Ferry) def Thangboi (Churachandpur, Manipur)

= Unanimous Decision (30-27, 30-27, 30-27)

WELTERWEIGHT

Ricky Malsawmzela (Dinthar) def C Lalrinhlua (Sairang Sihhmui)

= Unanimous Decision (30-27, 30-27, 30-27)

John Lalhunlawma (Phainuam) def Tyson Vanlalhruaimawia (ITI Veng)

= Split Decision (28-29, 29-28, 29-28)

MIDDLE WEIGHT - ROUND OF 16

C Lalhruaitluanga (Chawngtlai) def Vanlalsanga (Suangpuilawn)

= Knockout (Round 2, Minute 2:26)

Orient Goldsmith Fighter of the Night

- Israel Thangliana (R Vanhne)

Zan 15-na : September 25, 2026 (Zirtawpni) - 8:00 PM @ LPS Arena, Falkland

FIXTURE

FLYWEIGHT

B159 Lalruatfela (Ramhlun North) v PC Lalremruata (Bilkhawthlir)

B160 Malsawmdawngzela (Lungkawlh) v Vincent Khongsai (North Molhai)

B161 Chin Lion (Sate, Chin State, Myanmar) v Rommel Malsawmdawngliana (Lungtian)

BANTAMWEIGHT

B162 Lalnunpuia (Rangvamual) v Lalrinsanga (Thingsulthliah)

B163 C Lalruatfela (Tuirial) v Lalruatsanga (Maubawk)

B164 Lalfakzuala (Vairengte) v Lalbiaktluanga Fanai (Lawipu)

LIGHTWEIGHT

B165 H Zomuanpuia (Kolasib Khuangpuilam) v Onminlen (Churachandpur)

B166 Lalrohlua Pautu (Kanan Veng) v David Malsawmzela (East Lungdar)

WELTERWEIGHT

B167 VMS Tluanga (Dinthar) v Zothansanga (ITI Veng)

B168 Zohmangaiha (Upper Republic) v Francis Lalenrema (Chhinga Vengthlang)

MIDDLE WEIGHT - ROUND OF 16

B169 Franky H Vanlalruatpuia (Lunglei Salem Veng) v Boyka Lalruatsanga (Vaitin)