ZALEN, Sept. 15, 2026: Round hnihna khel zo thei lovin Malsawmtluanga lakah Lalremthanga Hmar a tlawm a, Thawhtanni zan Mizoram Labour Link LPS Pro Fight inhnek dangah Thangbiakdik chuan Remruatpuia a hneh bawk.

LPS Arena, Falkland-ah a vawi hnih nan mipui lawm hlawh, ‘Zo Awle’ a inlan a, Ratu rawltharin chhiar ngai khawpa a hnek hnuah kum 30 mi, Remthanga’n bei zui leh mah se a ding tluan zo lo va, round hnihna minute hnihnaah technical knockout-in kum 18 mi, Sawmtluanga a chak a, Inrinni zanah Tawipui South boxer N Lalhruaizela nen an inhmachhawn ang,

A tir atangin inhawng takin Remthanga leh Sawmtluanga an inhnek tawn hnem a, hnek thiam leh tlo zawk Ratu rawlthar a chungnung a, round hnihnaah a kut ding lamin chiang takin a vai tlu a. Referee Hriata Chhunthang chuan chhiarin Remthanga’n tho chhuakin inbei leh mah se Sawmtluanga’n nawr hnehin an inhnek tawn hle a, tlu zui lo mah se Sakawrdai boxer-in a peih tawh lo va, hruihrual kilah thuin a team-ten towel an vawm lut.

Flyweight inhnek dangah Ramthar North boxer Zakaria Lalneihpuia’n round hmasa ber a hloh hnuah awmze neiin Jacob Lalduhsaka, Chawntlangpui a hnek zui a, round hnuhnung pahnih lain unanimous decision-in a chak.

Nghalchawm tlangval, Moses Lawmkimthanga’n thiamna a neih hmangin Kevin Vanlalduhsaka, Bethlehem a thunun ve thung a, round hnihna minute khat leh second 55-ah technical knockout-in a hneh.

Bantam-ah inhnek vawi thum tho awmin Lamka, Manipur boxer Thangbiakdik chuan boxing tha pangngai tak lantirin Remruatpuia, Lungzarhtum lakah round thum a la vek a, unanimous decision-a a chak rualin Orient Goldsmith Fighter of the Night a dawng.

Thahrui nei tha, Lungzarhtum rawlthar Ruatpuia’n a tawp thlengin mar tha takin khel mah se Biakdika kut chhuak a rang a, a taksa leh a lu-ah hnek zawnsak foin a dang hneh lo.

Inhnek dangah Niawhtlang tlangval, Joab Lalrinawma’n round hmasa berah hnek hneh mah se round hnihna atangin Bawngkawn boxer Malsawmtluanga a insiam tha a, tha taka inveng chungin nghet takin a bei tluan a, judge pahnihin 29-28-in an chaktir a, pakhatin 29-28 thovin Rinawma chaktir mah se split decision-in Sawmtluanga a chak a ni.

Sairang boxer Lalrohlua’n split decision-in Bijay Rai, Bawngkawn a hneh bawk a, judge pahnihin 29-28-in an chaktir a, pakhatin 29-28-in Bijay an chaktir a. An inhnek hnem dun hle a, thahrui leh tharum ngah zawk Rohlua a dingchang hram a ni.

Light-ah Edenthar boxer Lalthazuala’n Lalramsawna, Ratu a awpbet a, thiamna leh an kut chhuak a inthlau a, round hnihna minute khat leh second 12-ah technical knockout-in a chak a. Dulte boxer Barnaba Lalmuanpuia’n awlsam takin Jacob Lalrokima Khiangte, Kelsih a hneh bawk a, round hma tluan lovin minute khat leh second sarihah technical knockout-in a chak a ni.

Inhnehtawk takin Malsawmkima, Vaphai leh Jeho Vanlalpekhlua, Rangvamual an inhnek ve thung a, Judge pathum point pekah 29-28, 29-28, 29-28-in Sawmkima a chak.

Welter-ah James VL Khawngaihkima’n VL Khawngaiha a hnek tam hle a, huaisen takin Ailawng boxer-in bei let mah se a tuar hnem a, round hnihna laihawlah technical knockout-in Bethlehem rawlthar, Khawngaihkima a chak.

Round khat khel tluan lovin Khatla South boxer Lalremtluanga Vantawl chuan Lalhruaizela, North Chawnpui a hneh bawk a, minute hnih leh second 29 an inhnek hnuah technical knockout-in a chak a ni.

Middle-ah Lunglei Sazaikawn boxer PC Lalramengmawia’n harsa takin Chanmari West tlangval, Vanlalmaka a hneh a, split decision-a a chak rualin round of 16 a lut.

Inhnehtawk takin an inbei tluan a, Engmawia’n inveng chungin a pan a, hnek chhuak tam lo viau chungin a hnek fuh a langsar a, veikhawr Maka’n chiang takin round hnihna la mah se judge pahnihin 29-28 ve vein Engmawia an chaktir a, pakhatin 29-28-in Maka a chaktir ve thung a ni.

Mizoram Labour Link LPS Pro Fight 2026

Zan 6-na : September 14, 2026 (Thawhtanni)

RESULT

FLYWEIGHT

Zakaria Lalneihpuia (Ramthar North) def Jacob Lalduhsaka (Chawntlangpui)

= Unanimous Decision (29-28, 29-28, 29-28)

Moses Lawmkimthanga (Nghalchawm) def Kevin Vanlalduhsaka (Bethlehem)

= Techinical Knockout (Round 2, Minute 1:55)

Malsawmtluanga (Ratu) def Lalremthanga Hmar (Sakawrdai)

= Techinical Knockout (Round 2, Minute 2:00)

BANTAMWEIGHT

Malsawmtluanga (Bawngkawn) def Joab Lalrinawma (Niawhtlang)

= Slpit Decision (28-29, 29-28, 29-28)

Lalrohlua (Sairang) def Bijay Rai (Bawngkawn)

= Slpit Decision (28-29, 29-28, 29-28)

Thangbiakdik (Lamka, Manipur) def Remruatpuia (Lungzarhtum)

= Unanimous Decision (30-27, 30-27, 30-27)

LIGHTWEIGHT

Lalthazuala (Edenthar) v Lalramsawna (Ratu)

= Techinical Knockout (Round 2, Minute 1:12)

Barnaba Lalmuanpuia (Dulte) def Jacob Lalrokima Khiangte (Kelsih)

= Techinical Knockout (Round 1, Minute 1:07)

Malsawmkima (Vaphai) def Jeho Vanlalpekhlua (Rangvamual)

= Unanimous Decision (29-28, 29-28, 29-28)

WELTERWEIGHT

James VL Khawngaihkima (Bethlehem) def VL Khawngaiha (Ailawng)

= Techinical Knockout (Round 2, Minute 1:15)

Lalremtluanga Vantawl (Khatla South) def Lalhruaizela (North Chawnpui)

= Techinical Knockout (Round 1, Minute 2:29)

MIDDLEWEIGHT

PC Lalramengmawia (Lunglei Sazaikawn) def Vanlalmaka (Chanmari West)

= Slpit Decision (29-28, 28-29, 29-28)

Orient Goldsmith Fighter of the Night

- Thangbiakdik (Lamka, Manipur)