ZALEN, Sept. 21, 2026: Mizoram Labour Link LPS Pro Fight kal mekah title fight-a inlan turte zawnna final zanah Zo Awle a inlan leh dawn.

October 13 zanah weight hrang hranga title chuh tur zawnna final buatsaih a ni dawn a, hetah hian exhibition bout pahnih zeh tel a ni dawn a, pakhat zawkah hian mipui lawm hlawh, Lalremthanga ‘Zo Awle’ Hmar inlan tura ruahman a ni.

Flyweight-ah kum 30 mi, Sakawrdai boxer hi a tel a, September 8-a Pro Fight tan zanah Khamsuana, Khawkawn a hneh a; September 14 zanah a tum hnih nan inlanin Ratu rawlthar, Malsawmtluanga lakah a chak zo lo.

Exhibition bout-ah hian Zo Awle bakah hmeichhe boxing tihlar nan hmeichhe inhnek pakhat a awm bawk ang.

Pro Fight kal mekah hian quarterfinal-a lutte October 3 zingah an inbuk tha leh vek dawn.

Thawhtannia LPS Office, Zarkawtah Chairman Lalsawmliana Pachuau kaihhruaiin Organising Committee thu khawmin Pro Fight vawi 12 tluang taka neih mek a nih avangin lawmawm an ti hle a, October 2-ah weight hrang pangaah round of 16 khelh zawh a ni dawn a, ruahmanna an lo siam tawh angin a tuk zing dar 8-ah quarterfinal lut zawng zawng LPS Office, Zarkawtah an inbuk tha leh vek dawn a ni.

Champion lai panga zinga pathum - Lalrinngheta (flyweight), Lalkhawngaiha (lightweight) leh F Lalthanliana Junior (middleweight) te chu champion kawnghren humhim turin title fight-ah an inlan dawn avangin weight pathumah hian title chuh tur zawnna final buatsaih a ni ang.

Bantam leh welter-ah champion lai, Laldinsanga leh Lallawmawma’n champion kawnghren an humhim dawn lo ve thung a, weight pahnihah hian title chuh tur zawnna final a awm ve dawn loh avangin semifinal-a chakte title fight-ah an inlan nghal ang.

October 16 zanah Title Fight buatsaihin championship hmawrbawk a ni dawn a, heta inlan tur boxer tha 10 hi October 15 zing dar 8-ah LPS Office-ah an inbuk dawn a ni.