ZALEN, Apr. 01, 2026: Pro Volleyball League-ah club-ten squad tihchak nan Mizoram pawn atangin hnam dang player pahnih leh Zo hnahthlak player an la lut thei dawn.

Mizorama volleyball inelna sang berah mipa team sarih leh hmeichhia team li an tel dawn a. Mizoram Volleyball Association (MVA)-in club-te tan kawng hawn zausakin Mizoram pawn atangin hnam dang player an duh zat lak luh a phalsak thin a tidanglam.

Tun season-ah bithliah siamin pahnih bak squad-ah ziah luh theih an ni dawn lo va, kum dang ang thovin inkhel paruk zingah pakhat chauh a tel thei dawn bawk a ni.

Chutihrualin MVA hnuaia inziak lut lai ni lo, Zo hnahthak player pakhat an la lut tel thei thung dawn a. Anni hi Mizo player pangngai ang thovin inkhel paruk zingah an tel a nih pawhin hnam dang player khelhna tibuai lova chhawr theih an ni ang.

Pro Volleyball vawi kuana hi May 11-ah LPS Arena, Falkland, Aizawlah tan a ni dawn a, thla khat chuang awhin June 13-ah mipa final hmanga hmawr bawk a ni ang.

Mipaah champion lai, Anastasia Electric Veng, nikuma final lut Thutak Nunpuitu Team, Tuichangral, Khawbel, Sihphir, Hunthar leh Chhinga Veng Spikers an inel dawn.

Hmeichhe lamah team thar pali - Tuichangral, Chhinga Veng Spikers, ITI Veng leh Eric Pautu Academy an inel ve thung ang.