ZALEN, May 13, 2025: Tuichangralin innghahna tlak team an nei tih lantirin Thawhtanni zan EverHome Pro Volleyball League-ah set thum faiin Hunthar an hneh a, semifinal lut thei turin hma an hruai fal.

LPS Arena, Falkland-ah tha takin Johan Vanneihsanga leh Zomuansanga an inlan bakah hlawkpui thamin player dangin an khel bawk a, 25-23, 25-19, 25-20-in Tuichangral an chak.

Nilaini khan set thum faiin Khawbel an hneh tawh a, mi mala harsatna tawk, Johan-a’n vawi khat chiah vaw tlain point nga a hloh va; mahse, Khawbel tlangval hian Hunthar lakah danglam hlakin a khel a, point 20 hmuhin tum nga a tisual a, Kuriz Player of the Match-a thlan a ni.

May 31, 2024 khan a vawi khat nan Pro Volleyball champion nih an tumna Tuichangralin an puitlin zo lo va, final-ah set thum set khatin Hunthar an hneh lo va. An intawn lehna hmasa berah inkhel an thunun tha hle a, Zomuana’n tum 18 vaw tlain point thum a hloh a, a khelh hnuhnunah hma a sawn zel.

Khawbel hmaah Rajneesh Singh chuan point 30 chuang hmuin mi malin a filawr a, Hunthar lakah tum 18 hlap tlain point 14 a paih ve thung a, R Vanlalmawia’n tum ruk leh Vanlaltanpuia’n vawi nga vaw tlain point khat leh point hnih an hloh.

Tuichangralin setter rinrawla an hman, C Zonunawmia aiah a tir atangin H Lalramdinmawia an luhtir a, set hmasa berah ball siam fuh tawk loh nei deuh mah se nghet tha takin a khel zui a; team thawh hona leh tanrualna hmangin player-ten rin ngam an ni tih an lantir.

Hunthar beiseina a tla hniam ve thung a, kar hmasa Thawhlehni khan set an hloh hmasak hnuah Sihphir an hneh a, an innghahna, Anurag Rawat chuan set khatna tawp lamah a ke vei lam tinain a khelh zawm thei lo va, Mizo hlangin hnehna hlu tak an sual chhuak a, Tuichangral erawh an el zo lo deuh.

Dam chiang lo chungin Delhi spiker Anurag chuan set khatna leh thumna a khel a, vawi 11 vaw tlain point sarih a hloh va. Khawbel hmaa che tha tak, Rohluzuala’n point li a hmuh aia tam tum ruk a tisual a, Laldampuia’n tum li chiah vaw tlain Lalbiakmawia Khiangte leh Lalramhluna point sarih ve ve hlawh chhuak mah se team an fuih phur zo chuang lo.

Team parukin vawi li theuh an khel kim chiah a, Tuichangralin point kua hlawh chhuakin hma an hruai a. Huntharin point thum kawlin an hniam ber a, team dang zawngin point ruk vek hmuin khelh khat theuh an la nei.

Tuichangralin Inrinni zanah Siphir an khelhpui dawn a, set khat an la a nih chuan semifinal an lut dawn a, set la miah lo pawh ni se team dang dinhmun azirin tlang theihna hun tha an nei tel.

Hunthar hmabak erawh a hautak a, Nilaini zanah Anastasia Electric Veng an hmachhawn ang a. Knockout round lut turin chiang taka set thum faia chak an mamawh mai bakah, team dang dinhmunah an innghat tel tho a ni.

Tuichangralin a tir atangin inringtawk takin Hunthar hmaah an khel a, Johan-a’n tha taka a service hmanga point li an hmuh zawn hnuah 9-3-in an sang a. Champion laiin bei letin Dampuia’n tum thum a hlap tlak hnuah Anurag chuan a hnung atangin a vaw tla a, 18-18-in an nih rual.

Point inhmuh chhawk chho zelin 23-23 a nih hnuah Zomuana’n a hlap tla a, Huntharin vaw tla ve leh nghal turin Johan-a service an la tha tawk lo va, Anurag chuan line pawnah vaw chhuakin Tuichangral an tlang.

Set hnihnaah Huntharin Anurag an awltir a; mahse, Sihphir nen an inkhelh tum angin Mizo hlangin an hriam tawk lo va. Rajneesh chuan Tuichangral point hmasa paruk zinga pathum thawk chhuakin 6-1-in hma an hruai.

Kawng hrang hrangah Huntharin an khan lo a; Mawitea vuak tlak hmangin Tuichangralin 18-12-a sang zawk an nih laiin Rajneesh an la chhuak a, Mizo hlang ve vein an inkhel zui a. Khawchhak team-in hmun chang tam lo an player-te tan hun tha siamsak zui zelin, 19-13-a hma an hruai laiin khel tha tak, Johan an la chhuak leh.

Inkhel thunun zui thovin Mawitea’n net chungah Rohlua hlap a dansak a, 24-19 a nih laiin Hunthar captain Dampuia a vaw kai lo va, point ruka inthlau chungin Tuichangralin set an la zawn a, nuam ti takin an khel.

Set thumna an tan rualin team pahnihin player an siksawi a, a tha thei ang bera player an rem khawm thin dan ang ve vein an inhmachhawn thar leh a. Anurag chuan Mawitea vuak a dan hnuah Rajneesh chuan a hlap kai lo va, 11-10-in Hunthar an sang a, an inkhelh chhunga hma an hruai awm chhun a ni nghe nghe.

Setter Ramdina la chhuakin Tuichangralin C Tea an dah lut a, Mawitea leh Zomuana’n point hmu zawnin khaw chhak team-in an lehpel leh nghal a, inthlau zui hret hretin Hunthar spiker Ramhluna’n point thum a hloh hnuah 19-15-in an sang.

Dam chiang lo, Anurag chuan chet a harsat telh telh a, Huntharin an hnaih zo tawh lo va. Johan-a’n vaw tla zawn chhovin point khat hmuh belha chak thei dinhmunah an inhung a, Zomuana’n 24-20-a sang zawk an nih laiin chiang takin a hlap tla a ni.

EVERHOME PRO VOLLEYBALL LEAGUE 2025 @ LPS Arena, Falkland

LEAGUE ROUND 4 : RESULT

May 12 (Thawhtanni) Zan

Tuichangral def Hunthar (mipa)

= 25-23, 25-19, 25-20 (3-0)

Kuriz Player of the Match

= Johan Vanneihsanga (Tuichangral)

STATS:

TUICHANGRAL:

Johan Vanneihsanga: point hmuh 20, point hloh 5

Zomuansanga: point hmuh 14, point hloh 3

Rajneesh Singh: point hmuh 18, point hloh 14

R Vanlalmawia: point hmuh 6, point hloh 1

Vanlalṭanpuia: point hmuh 5, point hloh 2

H Lalramdinmawia (setter): point hmuh 3, point hloh 2

HUNTHAR:

Anurag Rawat: point hmuh 11, point hloh 7

Lalbiakmawia Khiangte: point hmuh 7, point hloh 1

Lalramhluna: point hmuh 7, point hloh 3

Laldampuia: point hmuh 4, point hloh 1

Rohluzuala: point hmuh 4, point hloh 6

Ramngaihsanga (setter): point hmuh 3, point hloh 1

POINT TABLE:

TUICHANGRAL: Play 4, Won 3, Loss 1 (set lak 10, set hloh 4) : Point 9

KHAWBEL: Play 4, Won 2, Loss 2 (set lak 7, set hloh 6) : Point 6

ANASTASIA ELECTRIC VENG: Play 4, Won 2, Loss 2 (set lak 8, set hloh 8) : Point 6

SIHPHIR: Play 4, Won 2, Loss 2 (set lak 7, set hloh 7) : Point 6

THUTAK NUNPUITU TEAM: Play 4, Won 2, Loss 2 (set lak 7, set hloh 7) : Point 6

HUNTHAR: Play 4, Won 1, Loss 3 (set lak 3, set hloh 10) : Point 3

FIXTURE

MAY 13, 2025 (THAWHLEHNI) - 8:00 PM

Luangmual v Bungkawn (hmeichhia)

MAY 14, 2025 (NILAINI) - 8:00 PM

Anastasia Electric Veng v Hunthar (mipa)

MAY 15, 2025 (NINGANI) - 8:00 PM

Bungkawn v Jimmy Kanan (hmeichhia)

MAY 16, 2025 (ZIRTAWPNI) - 8:00 PM

Khawbel v Thutak Nunpuitu Team (mipa)

MAY 17, 2025 (INRINNI) - 8:00 PM

Tuichangral v Sihphir (mipa)

MAY 19, 2025 (THAWHTANNI) - 8:00 PM

Jimmy Kanan v Luangmual (hmeichhia)