ZALEN, June 04, 2026: Chhinga Veng Spikers-in point 35 chiah hlohin Eric Pautu Academy lakah set thum an la zawn a, Mizoram Rural Bank Pro Volleyball League hmeichhe final thlir chungin kawng dikah an kir leh.

An khelh hmasak berah set la lovin Tuichangral hmaah Chhinga Veng an tlawm a, Kerala atanga an lak luh, Anusree Poyili chuan an panna lai thawm phuiin a inlan hmasak berah vawi 29 a vaw tla a, point kua hloh tel mah se Kuriz Player of the Match a ni nghal.

Amah thlawptu Elisian Medai chuan point hnih chiah hlohin tum 14 a hlap tla bawk a, Eric Pautu Academy lakah Nilaini zan khan hneh takin inkhel an awpbet tluan.

Pro Volleyball League-a la tel ngai lo hmeichhe team pali an inel a, an inlan hmasak berah Spikers-in India captain ni tawh, Anusree an chhawr hman lo va. Chutihrualin anni ang bawka Mizo hlanga khel, Tuichangral hmaah a nghet tawk lo va, ball vuak tlak an harsat avangin beisei an pha lo.

Kum 28 mi, Anusree-i’n team phuar khawmin a fuih phur a, league khelh khat an la neihah ITI Veng GSA nen Thawhtanni zanah an intawng dawn a, an dinhmun a chiang leh zual ang.

Inelna sangah Mizo hlanga khel, Eric Pautu Academy player tam zawkin an la tel ngai lo va, kawng hrang hrangin Chhinga Veng an el pha lo viau a. Sarah Lalsuiengi leh Lalruatmawii ten point li hmuin mi mala hnuhma nei lian an ni a, a hmain ITI lakah set thum fai thova an tlawm tawh avangin final luhna kawng a ping a, Thawhtanni tlaiah Tuichangral nen inkhelin league an khar dawn a ni.

Inkhel an tan rualin Anusree-i leh Elisian-i ten vaw tla zawnin Chhinga Vengin inkhel an thunun nghal a, 8-2-in an kal fal a. A hnuah Agnes Lalthlamuanpuii’n Kerala spiker hlap a dang tla zawn a, Eric Pautu Academy-in bei letin Lalruatmawii’n a vuak tlak hnuah 14-15-in an hnaih chilh hman a; mahse, an ball hlap a inthlau a, Anusree-i an dan zui theih loh bakah a kawppui, Elisian chuan Spikers point hnuhnung pali a thawk chhuak a, point riata inthlauin set an la.

Chhinga Veng insawh nghetin an khawng tial tial a, Eric Pautu Academy-in danglamna siam thei player an neih loh avangin lehlam vuak dan leh lak tumin hun tam zawk an hmang a, an nawr let thei tawh lo. An inkar a zau zui hle a, player theihna an insan hleih tih a lang a, set hnihna leh thumna belh khawmin Eric Pautu Academy-in point 18 chiah an hmu a ni.

Spikers-in harsa lova set hmasa ber an lak hnuah hriam leh zualin Anusree-i a khel a, a hma atang chauh ni lovin a hnung atang pawhin a vaw tla zel a; Elisian-i’n tha taka a thlawp bakah Zonunpuii leh Lalbiakngheti ten team tanpui telin Tuichangral nen an inkhelh tuma ball siam tha tawk lo, setter F Lallianchhungi’n mi malin hma a sawn bawk.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT

Round 2 : June 03, 2026 (Nilaini)

Chhinga Veng Spikers def Eric Pautu Academy (hmeichhia)

25-17, 25-7, 25-11 (3-0)

Kuriz Player of the Match - Anusree Poyili (Chhinga Veng Spikers)

Cheetak Fan of the Night - Dennis Lalnuntluanga (Chhinga Veng)

MVA Lucky Fan - Christina Lalpekliani (Eric Pautu Academy), Biaknunmawii (Eric Pautu Academy)

STATS :

CHHINGA VENG SPIKERS

Anusree Poyili: Point Hmuh - 29, Point Hloh - 9

Elisian Medai: Point Hmuh - 14, Point Hloh - 2

Zonunpuii: Point Hmuh - 5, Point Hloh - 1

Lalbiakngheti: Point Hmuh - 5, Point Hloh - 1

Evelyn Malsawmtluangi: Point Hmuh - 3, Point Hloh - 0

N Lawmkimi: Point Hmuh - 1, Point Hloh - 1

F Lallianchhungi (setter): Point Hmuh - 2, Point Hloh - 2

ERIC PAUTU ACADEMY

Sarah Lalsuiengi: Point Hmuh - 4, Point Hloh - 2

Lalruatmawii: Point Hmuh - 4, Point Hloh - 3

Lalchhanmawii: Point Hmuh - 2, Point Hloh - 3

Anges Lalthlamuanpuii: Point Hmuh - 2, Point Hloh - 4

Zoramsangi: Point Hmuh - 1, Point Hloh - 1

Jacinta Rohlupuii (setter): Point Hmuh - 2, Point Hloh - 1

POINT TABLE

ITI VENG GSA: Play 1, Won 1, Loss 0 (set lak 3, set hloh 0) : Point 3

TUICHANGRAL: Play 1, Won 1, Loss 0 (set lak 3, set hloh 0) : Point 3

CHHINGA VENG: Play 2, Won 1, Loss 1 (set lak 3, set hloh 3) : Point 3

ERIC PAUTU ACADEMY: Play 2, Won 0, Loss 2 (set lak 0, set hloh 6) : Point 0

FIXTURE

MIPA - Round 7

June 04, 2026 (Ningani)

8:00 PM : Tuichangral v Sihphir

HMEICHHIA - ROUND 2

June 05, 2026 (Zirtawpni)

8:00 PM : ITI Veng GSA v Tuichangral

MIPA - Round 7

June 06, 2026 (Inrinni)

8:00 PM : Chhinga Veng Spikers v Hunthar