ZALEN, Apr. 29, 2025: A vawi khat nana Pro Volleyball League-a inlan tur, Khawbelin 2019 Asian Volleyball Championship leh 2021 Prime Volleyball League-a Best Middle Blocker lo ni tawh, Ashwal Rai-a la lutin state pawn atanga awmze nei tham pakhat an neih belh nen champion tumin an khelh theih an inbeisei.

Feet 6 leh inchi 7-a sang, Rai-a hi net bula lehlam vuak danah India rama hriat hlawh leh dah san a ni phak a. India aiawhin Asian Volleyball Championship, FIVB Volleyball World Cup leh South Asian Games-ah a lo inlan tawh.

Asian Volleyball Championship leh Prime Volleyball League-a mi mal lawmman a dawn tawh bakah hian 2019 South Asian Games-ah khan India chu gold medal a lakpui bawk.

Prime Volleyball League-ah hian Kolkata Thunderbolt-ah a la khel mek bawk.

Tun tumah hian a vawi khat nana Pro Volleyball League-a inlan tur, Khawbelin an la lut a, coach Vanlalmawia chuan ‘Mizo player an neihte tan inelna a hautak dawn a, state pawn atanga player awmze nei tham pakhat an neih belh chuan champion tumin an khel thei ang’ tih a sawi.

Mawia hi 2017 leh 2018-a kum zawna Hunthar champion-puitu kha a ni a, ball vuak lamah team hriam ber an ni dawn lo tih a hre chiang a; mahse, team inpumkhatna leh thawh hona tha nei turin an inpuahchah a, Mizo player langsar kawl lo chungin a player-te chungah rinna a nghat.

Tun season Pro Division inelnaah Khawbelin TNT leh Tuichangral an el phak lo deuh a, chutih lain Mizo player tawn hriat nei tha, Lalruatfela Sailo leh setter David Lalramhmachhuana an kawl a. Zonunsanga, Lalhruaizela, Rodingliana leh player dangten Rai-a an thawhpui thiam a nih chuan team hlauhawm tak an ni thei dawn a ni.

An khelh hmasak berah Nilaini zan hian LPS Arena, Falkland, Aizawlah Pro Volleyball League-a sulhnu nei tha ber, Hunthar nen an inhmachhawn dawn a ni.

KHAWBEL SQUAD:

1. Lalhruaizela

2. Rodingliana

3. Clement Lalruatzela

4. Francis Lalhmingliana

5. Joseph Lalbiaksanga

6. Clement Lalhmingliana

7. Innocent Malsawmzuala

8. Lalhunthara

9. Lalchhanhima

10. Zonunsanga

11. Joseph Zoramhmangaiha

12. H Malsawmsanga

13. Paulunlal

14. Jimmy Zothantluanga

15. Lalruatfela Sailo

16. R Lalmalsawma

17. David Lalramhmachhuana

18. Lianhlusang Vaiphei

19. Ashwal Rai

Coach: Vanlalmawia

Assistant Coach: K Ramtharlawma, Richard Laltanpuia

KHAWBEL FIXTURE (League round):

APRIL 30, 2025 (NILAINI) - 8:00 PM

Khawbel v Hunthar

MAY 2, 2025 (ZIRTAWPNI) - 8:00 PM

Khawbel v Sihphir (Mipa)

MAY 7, 2025 (NILAINI) - 8:00 PM

Tuichangral v Khawbel

MAY 10, 2025 (INRINNI) - 8:00 PM

Anastasia Electric Veng v Khawbel

MAY 16, 2025 (ZIRTAWPNI) - 8:00 PM

Khawbel v Thutak Nunpuitu Team