ZALEN, May 01, 2025: Mizoram inelna sang bera an inlan hmasak berah chiang takin Khawbel an chak nghal a, Nilaini zan EverHome Pro Volleyball League-ah set hloh lovin champion lai Hunthar an hneh.

LPS Arena, Falkland-ah Ashwal Rai chuan fel fai takin thiamna sang a lantir a, Khawbel tan a khelh vawi khatnaah point 32 hmuin vawi hnih chiah a tisual a, 25-21, 25-20, 25-23-a an chak rualin Kuriz Player of the Match-a thlan a ni.

Season liam ta khan Anurag Rawat chuan Hunthar an champion theih nan a thawh hlawk hle a, tun tumah erawh thil awm dan a danglam a, point 34 thawk chhuak mah se 13 hlohin set khat mah la lovin league bul an tan.

Kum zawn, 2017 leh 2018-a Hunthar champion-puitu coach Vanlalmawia’n Khawbel enkawlin, player-ten point hloh an nei tlem a, 2024 Indian volleyball best player Ashwal chuan team a khai khawm tha hle bawk a, Indian blocker tha bera ngaih a nih tel bawk avangin lehlamin an el zo lo.

Pro Volleyball a khelh hmasak berah Lianlunsang Vaiphei chuan vawi riat vaw tlain tum khat a tisual a, Lalruatfela Sailo chuan point hloh nei lovin tum li a hlap tla bawk. Setter tawn hriat nei, David Lalramhmachhuan’n ball a vawrh sual tlem a, feet 6 leh inchi 8-a sang Ashwal-a hovin inpumkhat tha takin Khawbelin an khel.

Hunthar tan Pro Volleyball-a mi thar, Rohluzuala’n tum sarih vaw tlain point khat a hloh a, Anurag thlawp thei ber niin ani bak vawi hnih aia tam hlap tla thei an awm lo. Division hniam atangin April tir khan playoff hmangin Pro Volleyball-ah Hunthar an kir ve leh chauh a, season liam taa champion team player ang kha an nei phak lo.

Set khatna tir atangin Khawbelin hma an hruai a, Sanga Vaiphei leh Ashwal chuan vaw tla zawnin 8-4-in an sang nghal. Karnataka atanga an lak luh India international hian a ball hmuh na taka vaw kher lovin awmze nei takin a thlen a, a rei tial tiala a ball vuak a nghetin lehlam ban pharna chungah a hlap tla fo.

Huntharin Anurag an chhawr rim a, a vuak tlak zawn hnuah 18-19-in an hnaih hman na a, Ashwal chuan point thum hmu zawnin 24-20-in Khawbel an sang leh a, Rohlua’n hlap tla ve leh mah se Anurag chuan tisualin lehlam an pawt ding thei lo.

Set hnihnaah a hma aiin Khawbelin inkhel an thunun hneh a, Ashwal chuan a vuak tlak mai bakah net bulah lehlam hlap a dang hnem a, mi mala a elpui, Anurag-a vuak a dan tlak rualin 12-7-in hma an hruai. Huntharin an hnaih zo lo tluan a, point ngaa inthlau chungin Khawbelin set an la zawn.

A kaw tawpah Hunthar an tang tawh a, set thumna lak ngei tumin an nawr leh nasa. Anurag chuan a hnung leh hma atangin point a thawh hlawk a, Rohlua’n thlawp bawkin 22-19-in a sang hman. Boruak sangah Ashwal chuan Khawbel fuih phurin an pawt tla a, a vuak tlak zawn hnuah tha taka a service an la theih lo zawn leh a, point khat hmuh belha chak thei turin 24-22-in an lehpel.

Hunthar spiker Anurag chuan vaw tla ve leh mah se Rodinpuia’n chakna point hmu chhunzawmin a hlap tla a. Champion lai lakah set thum faia an chak nghal avangin Khawbelin hlim takin hnehna an lawm a, title cho ngam an ni tih lantir chungin tha takin league bul a tan.

Zirtawpni zanah Khawbelin an khel leh dawn a, ani ang bawka Pro Volleyball team thar Sihphir an hmachhawn ang. Inrinni zanah Huntharin anni ang bawka bultan fuh lo leh Tuichangral laka tlawm tawh TNT an khelhpui ve thung dawn a ni.

EVERHOME PRO VOLLEYBALL LEAGUE 2025

@ LPS Arena, Falkland

LEAGUE ROUND 1 : RESULT

April 30 (Nilaini) Zan

Khawbel def Hunthar (mipa)

= 25-21, 25-20, 25-23 (3-0)

Kuriz Player of the Match

= Ashwal Rai (Khawbel)

STATS

KHAWBEL

Ashwal Rai : point hmuh 32, point hloh 2

Lianlunsang Vaiphei : point hmuh 8, point hloh 1

Lalruatfela Sailo : point hmuh 4, point hloh 0

Lalhruaizela : point hmuh 3, point hloh 4

Joseph Lalbiaksanga : point hmuh 2, point hloh 1

David Lalramhmachhuana (setter) point hmuh 2, point hloh 0

HUNTHAR

Anurag Rawat : point hmuh 34, point hloh 13

Rohluzuala : point hmuh 7, point hloh 1

Joseph Zairemtluanga : point hmuh 2, point hloh 1

Lalramhluna : point hmuh 2, point hloh 2

Laldampuia : point hmuh 1, point hloh 1 

Lalbiakmawia Khiangte : point hmuh 2, point hloh 3

Ramngaihsanga (setter) : point hmuh 0, point hloh 1

FIXTURE

MAY 1, 2025 (NINGANI) - 8:00 PM

Sihphir v Anastasia Electric Veng (mipa)

MAY 2, 2025 (ZIRTAWPNI) - 8:00 PM

Khawbel v Sihphir (Mipa)

MAY 3, 2025 (INRINNI) - 8:00 PM

Hunthar v Thutak Nunpuitu Team (mipa)