ZALEN, May 16, 2026: A tir lamah insiam rem mai lo mah se Mizoram Rural Bank Pro Volleyball League-a an inlan vawi khatnaah Huntharin team dang tan vaukhanna an chhuah nghal a, Sihphir beiseina beng hniamin set hnihna atangin inkhel an thunun tluan.

Zirtawpni zan inkhelah set hmasa ber an hloh hnuah Hunthar coach VL Malsawma Renthlei chuan player-te khelh dan tidanglamin tanhmun an siam tha a, Mizorama a inkhelh hmasak berah Uttar Pradesh atanga an lak luh, Suryansh Tomar chuan vawi 32 vaw tlain point 12 a hloh a, Kuriz Player of the Match lawman a dawng nghal.

Fabian Lallunghnema leh Lalbiakmuana ten point 10 chuang ve ve hmu bawkin Huntharin nuam ti takin an khel a, tawn hriat an neih that lantirin ruahmanna leh thiamna hmanga inelnaah an chungnung. 

Season liam taah champion lai ni chungin mipa team paruk inel zingah Hunthar an hniam ber a, league vawi nga an khelhah tum khat chiah chakin kai thar, Sihphir hi an lo hneh tawh.

Tun tumah an champion hnuhnun ber, kum 2024-a an player pawimawh pahnih, setter Remsangzuala leh spiker Fabian-a an la kir leh a, kum 2017 leh 2018-a a zawna an champion laia an player langsar, Biakmuana an ko kir bawk.

Team tichak leh zual tura an lak luh, Suryansh a che tha nghal a, an khelh hmasak ber atangin Pro Volleyball League chanchina team hlawhtling ber an nih tawhna boruak an chhem alh thar leh.

Nilaini zan khan Sihphirin a umtu zawk ni chhungin Chhinga Veng Spiker an hneh a, inrintawkna an neih san vanglai takin league round hmasa bera awl, Hunthar an hmachhawn a. Inkhel an tan rualin team boruak tha an chhawm lut a, Kerala atanga an chawk luh, Niyas Abdul Salam-a’n a vaw sual mang lo va; Albert Zothankhuma’n lehlam innghahna pahnih, Suryansh leh Fabian-a vuak a dansak fo bawk a, set hmasa ber an lak hnuah che tha zui zelin Vanlalawmpuia’n Fabian-a vuak a dansak rualin 11-7-in set hnihnaah an sang hman.

Huntharin an player-te ball an vuaktirna hmun tidanglamin nasa leh zualin Sihphir point hmuhna khawlpui an veng zui bawk a. Niyas-a leh Sihphir hnungtawlh hret hretin lehlamin an nawr na tial tial a, Suryansh-a’n hlap tla zawnin 16-13-in Huntharin an lehpel a, hawi kir tawh lovin set hnihna an la.

Hunthar an insawh nghet zel a, setter tawn hriat nei, Lalmama’n awmze neiin ball a sem a, Suryansh-a mai bakah 2024 Mizo Best Player Fabian-a’n a ball hmuh point-ah a chantir thei a, veikhawr Biakmuana’n vaw na lo mah se fing takin a hlap tla thin a. Sihphir talbuaiin an rin ber, Niyas-a’n vuak tlak a harsat a, insiam that leh tumin inthlak kual mah se boruak an chawk nung zo tawh lo va, a tawp thlengin a bet zawkah an tang tluan.

Chhinga Veng an hneh tumin Niyas-a’n point 36 a hmu a, Hunthar hmaah tum 27 chiah hlap tlain point a hloh zat erawh 20 ve ve niin a inang a. Albert-a’n point 11 hmuin Lalneihpuia Hrahsel leh Lalramhluna ten tum riat ve ve an hlap tla a, player-ten hnuhma an neih dan khaikhinin Hunthar an el zo lo deuh.

An khelh hmasak bera an chet dan atangin vawi thum champion tawh, Huntharin el tham tak an ni tih an lantir tel a, Thawhtanni zanah inlan lehin rin hlawh zawk ni chungin Khawbel an khelhpui ang.

Intuai thar leh tura hun thawl an mamawh angin round thumnaah Sihphir an awl ve thung dawn a, hriam zawka kir leh tumin Ningani zanah an khel leh dawn chauh a, champion lai, Anastasia Electric Veng nen an inhmachhawn ang.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT

Round 2 : May 15, 2026 (Zirtawpni)

Hunthar def Sihphir (mipa)

19-25, 25-20, 25-16, 25-22 (3-1)

Kuriz Player of the Match - Suryansh Tomar (Hunthar)

Cheetak Fan of the Night - Rosie Lalrinsangi (Hunthar)

STATS:

HUNTHAR

Suryansh Tomar: Point Hmuh - 32, Point Hloh - 12

Fabian Lallunghnema: Point Hmuh - 12, Point Hloh - 4

Lalbiakmuana: Point Hmuh - 11, Point Hloh - 2

Lalbiakmawia Khiangte: Point Hmuh - 5, Point Hloh - 3

Remsangzuala (setter): Point Hmuh - 3, Point Hloh - 1

SIHPHIR

Niyas Abdul Salam: Point Hmuh - 27, Point Hloh - 20

Albert Zothankhuma: Point Hmuh - 11, Point Hloh - 3

Lalneihpuia Hrahsel: Point Hmuh - 8, Point Hloh - 2

Lalramhluna: Point Hmuh - 8, Point Hloh - 2

Vanlalawmpuia: Point Hmuh - 7, Point Hloh - 4

F Lalhmingmawia (setter): Point Hmuh - 3, Point Hloh - 1

POINT TABLE

ANASTASIA : Play 2, Won 1, Loss 0 (set lak 6, set hloh 2) : Point 6

HUNTHAR : Play 1, Won 1, Loss 0 (set lak 3, set hloh 1) : Point 3

KHAWBEL : Play 2, Won 1, Loss 1 (set lak 4, set hloh 4) : Point 2

SIHPHIR : Play 2, Won 1, Loss 1 (set lak 4, set hloh 4) : Point 2

CHHINGA VENG : Play 1, Won 0, Loss 1 (set lak 2, set hloh 3) : Point 1

TUICHANGRAL : Play 1, Won 0, Loss 1 (set lak 2, set hloh 3) : Point 1

TNT : Play 1, Won 0, Loss 1 (set lak 1, set hloh 3) : Point 0

FIXTURE (mipa) - ROUND 2

May 16, (Inrinni)

8:00 PM : Thutak Nunpuitu Team v Tuichangral

Round 3

May 18, 2026 (Thawhtanni)

8:00 PM : Khawbel v Hunthar

May 19, 2026 (Thawhlehni)

8:00 PM : Anastasia Electric Veng v Tuichangral

May 20, (Nilaini)

8:00 PM : Chhinga Veng Spikers v Thutak Nunpuitu Team