PRO VOLLEYBALL: Kum kaw kal ta final-a an hneh, TNT tum nawn turin Anastasia-in final lut

ZALEN, May 22, 2025: Kum kaw hnuah Anastasia Electric Vengin final an lut leh a, Nilaini zan EverHome Pro Volleyball League semifinal-ah set hloh lovin Khawbel an hneh a, 2016 final ang bawkin Thutak Nunpuitu Team nen an intawng leh dawn.

LPS Arena, Falkland-ah inhnehtawk tak chungin Anastasia an chungnung tluan a, set thumnaah 23-19-a hniam zawk atangin Khawbel an pawtthla a, 25-23, 25-22, 25-23-in an chak.

Karthik Madhu an lak luh atangin khelh thum an chak zawnna a ni a, India captain hlui hian Electric Veng team tan point 27 hmuin tum li chiah a tisual a, Kuriz Player of the Match-a thlan a ni.

A vanglaia Indian blocker tha, Karthik chuan net chungah Khawbel rinrawl, Tanish Choudhary a dang tla fo a. A hnunga a awm laiin Helly Vanlalliana’n lehlam hlap dang ve thungin hlawk takin Anastasia tan a khel bawk a, point khat chiah hlohin point 10 a thawk chhuak.

Khawbelin Tanish an chhawr rim leh a, tum 38 vaw tlain point 15 a hloh va. Team nawr kal tur khawpin Mizo player-ten an thlawp zo lo va, Lianlunsang Vaiphei chuan tum ruk hlap tlain Joseph Lalbiaksanga’n vawi li a vaw tla a, point hnih ve ve an paih tel.

Anastasia tan Laldinsanga leh Laldensanga an hriam tawk lo na a, pont kua leh point riat hmuin Khawbel Mizo player che tha ber aiin an thawh hlawk ve ve a. Mizo player-te khelh danin team pahnih inkar a tidanglam a, Karthik chuan a elpui, Tanish aiin ball hmu tlem mah se team tan a thawk nep bik lo.

Pro Volleyball hmasa ber, 2016 khan league-a sang ber, TNT hnehin Anastasia an champion a, 2019 khan champion zui ta, Durtlang North hneh lovin semifinal atangin an tla ve thung a. Kum nga hnuah a sang pali zingah tel lehin a vawi hnih nan final an lut a, Inrinni zanah TNT nen bawk champion nih an inchuh ang.

Mizoram inelna sang bera an tel hmasak berah Khawbelin tunlaia Indian player tha, Ashwal Rai an la lut a, a hovin an khelh hmasak pahnihah set hloh lovin an chak zawn a. An kawl zui theih loh avangin India Under 21 team-a tel tawh, Tanish an lak leh phah a, a hova tum li an khelhah a vawi thum nan an tlawm.

League-ah Anastasia-in set thum set khatin Khawbel an hneh tawh a, inrintawkna an neih phah tih hun pawimawh leh boruak sangah an lantir a. Set khatnaah a tu zawk mah sang bik mai thei lovin 21-21 thlengin an intluk tawk a, Densanga’n a vuak tlak zawn hnuah Electric Veng team-in an kalsan.

Tanish chuan vawi hnih a vuak tlak kar lakah Anastasia captain Lalruatsanga’n point a hmu a, 24-23-in Khawbelin an hnaih hnuah ho takin H Malsawmsanga’n a service dik lo va. Electric Veng team-in set hmasa ber an lak atangin rilru lam nghawng khawpa an inum chhoh lai hun pawimawhah an dingchang zui zel.

Set hnihnaah pawh 18-18 thlengin an intluk leh a, Helly chuan Tanish-a vuak dangin Dinsanga’n a hlap tla ve thung a, point hnihin Anastasia an sang a, an hawi kir tawh lo va. Tanish chuan Densanga vuak dangin 23-22-in Khawbelin an hnaih chho a, Karthik chuan point hniha an inkar a tihzauh leh hnuah Tanish chuan line pawnah a vaw chhuak a, Electric Veng team-in set an la zawn.

Set thumnaah 17-17 atangin Khawbelin an kalsan ve thung a, Tanish chuan hlap tlain lehlamin chhang let thei lovin Ruatsanga’n point a hloh va. Dinsanga’n nam kai lo zui lehin point thumin Anastasia an hniam a, an chiai hman.

Karthik-a khelh dan a tlak hniam avangin coach PC Lalhriatpuia’n a hma anga che tha tawk lo, Dinsanga nen thlak a tum a, khelmual atangin an chhuak tawh a; mahse, a hmain player a thlak kual tawh avangin a ngai anga an khelh zui zel a tul a, a hnuah Tanish chuan point thum hmu zawn lehin 23-19-in Khawbel an sang.

Set hloh ngei tura ngaih an nih hnuah Anastasia an kir leh a, Karthik chuan vaw tlain Tanish-a vuak a dang zui bawk a. Sangbawiha vuak an dansak leh hnuah point khat chiahin an inthlau tawh a, set lak mamawh Khawbel zawk talbuaiin anmahni tihsual atang vekin point thum an hloh leh a, Electric Veng team-in point ruk an hmuh zawn hnuah awlsam ang reng takin hnehna an chang a ni.

EVERHOME PRO VOLLEYBALL LEAGUE 2025 @ LPS Arena, Falkland

SEMIFINAL : RESULT

May 21 (Nilaini) Zan

Anastasia Electric Veng def Khawbel (mipa)

= 25-23, 25-22, 25-23 (3-0)

Kuriz Player of the Match

= Karthik Madhu (Anastasia)

STATS:

ANASTASIA:

Karthik Madhu: point hmuh 27, point hloh 4

Helly Vanlalliana: point hmuh 10, point hloh 1

Laldensanga: point hmuh 8, point hloh 3