ZALEN, May 07, 2026: Mizoram Rural Bank Pro Volleyball League-ah Nivia-in a hranpaa ball an siam, ‘Vakul’ hman a ni dawn a, Ningani chhun khan LPS Vision Director Lalsawmliana Pachuau-in a tlangzarh.

Infiamna bungrua leh hmanraw hrang hrang siamtu company lian, Nivia-in kum dangah pawh Pro Volleyball League-a hman tur ball a tumsak thin a. Kuminah pawh spot volley tumsak leh tho mah se Mizoram volleyball inelna sang berin mipui hlut hlawha hma lam a pan zel avangin a hranpa liau liauin a siamsak a, a bika ball hman turah hian a hming ‘Vakul’ tih chhut kai a nih bakah Pro Volleyball League logo nem kai a ni bawk.

LPS Vision Office, Zarkawt, Aizawlah Organising Committee Chairman Sawma’n a tlangzarh rualin Pro Volleyball League tan thil thar leh hmasawnna chhinchhiahtlak a ni tih a sawi a, “LPS leh Mizoram Volleyball Association (MVA)-in India-a company lian ngaihven tham inelna an buatsaih thei chu thil lawmawm tak a ni,” a ti.

MVA Vice President C Lalrokhuma chuan Mizo nun hluiah, thangchhuah leh khuangchawi theite chauhin Vakul chang an tawn thei a, Pro Volleyball League pawh Pro Division-a awm club-te chauhin an khelh theih inelna sang a ni a; chuvangin, ball hming atan Mizote tana sava pawimawh tak, ‘Vakul’ tih phuah a nih thu a sawi bawk.

Pro Volleyball League vawi kuana atan kawng hrang hrangin inpuahchahnain a vawrtawp a thleng mek a. Thawhtanni zanah LPS Arena, Falkland, Aizawlah mipa team sarih inel tanin a hawn zanah champion lai, Anastasia Electric Veng leh Thutak Nunpuitu Team (TNT) an inkhel ang.

Hmeichhe lama team pali an inel ve thung dawn a, June 1-ah tan ve thungin Eric Pautu Academy leh ITI Veng GSA, Tuichangral leh Chhinga Veng Spikers an inkhel dawn a, an inlan kim nghal vek ang.