ZALEN, May 21, 2025: Thutak Nunpuitu Team-in harh tharna changin a vawi li nan final an lut a, Thawhlehni zan EverHome Pro Volleyball League semifinal-ah rin hlawh, Tuichangral duhthusam tihtawpsakin set thum set hnihin an hneh.

LPS Arena, Falkland-ah Muanna Veng team-in 23-20-a sang zawk an nih hnuah set khatna an hloh a, set hnih set khata hniam zawk ni zui leh mah se Vanlaltanchhana’n team fuih phurin 23-25, 25-13, 21-25, 25-19, 15-11-in an chak.

Tuichangralin championship hawnna inkhel hmasa berah set hloh hmasa zawk ni chungin TNT an hneh tawh a; Inrinni khan semifinal lut sa chhungin set thum set khat thovin Sihphir an hneh a, hei vang hian derthawng takin Muanna Veng team-in Sihphir an luahlan thei a, knockout round an lut hram.

2018 leh 2024-ah final lut tawh mah se league-a sang ber, Tuichangralin a vawi khat nan champion an tumna tihlawhtling turin kum dang zawng aiin rin an hlawh a, season liam ta semifinal-ah TNT nen intawng tawhin tawnhriat tha tak an nei a, set thum faiin an chak.

Mahse, 2023 champion TNT-in a vawi hnih nan Mizo hlanga champion an tumna tinung thar lehin rahbi pawimawh an tuk ve thung a. Intel ruh tha takin player tinin hma an sawn a, lehlam vuak dang turin net bulah an zuang taima a, point tinah insawrbingin tihsual an neih tam loh bakah tlaktir mai lovin ball an la thei hle bawk.

Valbuanga’n point 29 hmuin championship kal mek vawi ruk a khelh tawhah a hlawh chhuah tam ber a ni a, point 11 a hloh va. Lehlamna nen an inum boruak a san laiin a hma leh hnung atangin a hlap tla hnem a, TNT boruak tinungin chan chhe zawk an nih hmasak hnuah tha takin an nawr let thei zel.

Mizo blocker tha, Zosangzuala’n a theihna lantir bawkin a vuak tlak aiin lehlam hlap a dan thlak a tam a, point hnih chiah paihin 16 a thawk chhuak a. Saidingpuia Sailo chuan tum dang zawng aiin tihsual a nei tlem a, vawi 12 vaw tlain point thum a hloh a, K Zodingliana leh Sadrak Fanai chuan awmze neiin team an tanpui bawk a, inkhairual takin an thawk ho.

Ball vaw thlatu nei tha bera ngaih, Tuichangral rinrawlte chet that tum a ni lo hlawm a, setter tih loh mi dang pangain point 10 leh a aia tam thawk chhuak vek mah se an khelhpuite aiin tihsual an ngah a. An khel a nghet lo a, set lina atangin an hnungtawlh a, bei let zo lovin an bet tluan zak.

Rajneesh Singh chuan vawi 22 vaw tlain captain Zomuansanga’n tum 13 a hlap tla bawk a, chutih laiin an vuak tlak chanve aia tam point an hloh ve ve a. Johan Vanneihsanga’n point 16 a hmuh zahve paih bawkin Vanlaltanpuia’n point 13 leh R Vanlalmawia’n point 10 an hmu a, hloh tam lo ve ve mah se awmze nei thamin team an chawi kang pha lo.

Khelh hnih tlawm zawn lai, TNT-in vawi thum chak zawn mek, Tuichangral lakah khingbai deuh takin an khel a, setter F Lalhriatpuia a dam that tawk loh avangin captain Vanlalchhantluanga Sailo (Bawiha) chuan a tir atanga set thumna laihawl thleng ball a sem a. Chuti chungin Valbuanga’n a hlap tlak rualin 7-4-in an sang a, nung takin bul an tan.

Tuichangral setter C Zonunmawia’n a nam sual hnuah 16-10-in an inkar a zauh belh a, Bawiha’n a hui tlak rualin set khatna la thei mai turin 23-20-in an sang zui a. Khawchhak team-in bei letin an pawtthla a, point nga hmu zawnin an inkhelh chhunga rilru lama an paukhauh lai ber a ni a, hetih chhung hian Johan-a’n tum thum a vaw tla a ni.

Set hnihnaah hnual lovin TNT an insiam tha a, a hma aia phur zawkin a tir atangin an nawr bet leh. a Net chung atangin Rajneesh-a vuak an dang fo a, Lalmama’n Zomuana hlap dang tel bawkin Tuichangral an bet hle a, Valbuanga’n Johan-a hlap a dansak hnuah Zodinga’n vaw tlain 15-5-in an kalsan.

Chiang taka set an lak theih nan Valbuanga’n point hnuhnung pahnih thawk chhuakin lehlamin point 13 chiah an hmu ve hman a. Set thumnaah erawh Tuichangralin boruak tidanglamin Valbuanga an veng tha a, Rajneesh, Johana leh Zomuana’n hlah mang lovin an ball hmuh point-ah an chantir a, 15-6-in an sang.

TNT-in um zuiin Zodinga’n a vuak tlak hnuah Rajneesh an dang a, 21-19-in an hnaih leh hman a. Johan-a’n khawchhak team hlauhthawn tibova a vaw tla a, TNT setter Hriata che sual zuiin 24-21 a nih hnuah Rajneesh chuan set hnih an lak nan chiang takin an hlap tla a ni.

Set lak belh leh se a vawi thum nan Tuichangralin final an lut dawn a, chuti chungin anni aia derthawng, TNT-in set lina atangin inrintawkna leh phurna an nei sang a, 6-6 a nih hnuah khawchhak team-in set ngana point hnuhnung ber thlengin a um tluan zak.

Rajneesh chuan line pawnah vaw chhuakin Johan-a’n a hlap kai lo bawk a, C’Tea’n point a hloh ve leh hnuah 20-15-in TNT-in an kalsan a. Tuichangralin an dinhmun siam tha turin point hmuh zawn an harsat a, point ruka inthlau chungin Muanna Veng an tlang a, set hnih ve ve an lak rau rauah khawchhak team aiin point an hmu tam zawk hle.

Set tinah boruak inthlak tidanglamin a chak zawk tihfelna hnuhnungah TNT-in team tlo zawk an nihna lantir thei a, Valbuanga leh Sadraka’n point an hmuh zawn hnuah Rajneesh chuan a hlap sual a, 3-0-in an sang nghal.

Rin an hlawh vanglaiin Tuichangralin harsatna an lo tawk tawh thin a, tun tumah pawh an talbuai leh a. Point khat a hlut em em laiin Tpa’n a service dik lo a, Johan-a vuak Zodinga’n dansakin Valbuanga’n a hlap tla zui ve thung a, ho taka Lalmama service an lak theih loh hnuah TNT-in point li an hmu zawn a, 8-2-in an sang.

Boruak sang leh mipui au thawm ring tak karah nuam ti takin Muanna Veng team-in an khel a, Sadraka’n a hlap kai loh hnuah 11-8-in Tuichangralin hnaih leh hman mah se a tihsual siam thain Muanna Veng tlangval hian ball a hmuh zui vawi hnihah point a hmu ve ve.

Tpa leh Rajneesh chuan a khat tawkin an chhang let na a, TNT kal tluang an pawt ding zo lo va. Valbuanga’n a hlap tlak hnuah point khat neih belha chak thei turin 14-10-in an sang a, Tpa’n vawi khat dan mah se Tuichangral player hlui, Saitea’n a vaw tla a, inkhelh chhung zawnga au tluan TNT tantuten ring takin thawm an chhuah a ni.

TNT-in final an luh hmasak tum hnih, 2016 leh 2022-ah Anastasia Electric Veng leh Durtlang North an hneh lo ve ve a, kum hnih kal ta khan a vawi khat nan chakin Mizo hlanga champion awm chhun an ni.

Final-a inlan hnem ber leh vawi li khel tawh, Hunthar nih rualin, Nilaini zan semifinal inkhel hnuhnung zawk, Khawbel leh Anastasia Electric Veng chak zawk nen Inrinni zanah champion nih an inchuh ang.

EVERHOME PRO VOLLEYBALL LEAGUE 2025 @ LPS Arena, Falkland

SEMIFINAL : RESULT

May 20 (Thawhlehni) Zan

Thutak Nunpuitu Team def Tuichangral (mipa)

= 23-25, 25-13, 21-25, 25-19, 15-11 (3-2)

Kuriz Player of the Match

= Vanlaltanchhana (TNT)

STATS:

TNT:

Vanlaltanchhana: point hmuh 29, point hloh 11

Zosangzuala: point hmuh 16, point hloh 2

Saidingpuia Sailo: point hmuh 12, point hloh 3

K Zodingliana: point hmuh 9, point hloh 1

Sadrak Fanai: point hmuh 8, point hloh 3

Vanlalchhantluanga Sailo (setter): point hmuh 1, point hloh 2

TUICHANGRAL:

Rajneesh Singh: point hmuh 22, point hloh 13

Johan Vanneihsanga: point hmuh 16, point hloh 8

Vanlalṭanpuia: point hmuh 15, point hloh 4

Zomuansanga: point hmuh 13, point hloh 7

R Vanlalmawia: point hmuh 10, point hloh 2

C Zonunmawia (setter): point hmuh 3, point hloh 4

FIXTURE:

SEMIFINAL (MIPA)

MAY 21, 2025 (NILAINI) - 8:00 PM

Khawbel v Anastasia Electric Veng

FINAL (HMEICHHIA)

MAY 23, 2025 (ZIRTAWPNI) - 8:00 PM

Luangmual v Jimmy Club Kanan

FINAL (MIPA)

MAY 24, 2025 (INRINNI) - 8:00 PM

Thutak Nunpuitu Team v Khawbel/Anastasia Electric Veng