ZALEN, June 29, 2026: Pro Division hmun ruak pahnih hnawh khat turin playoff khelh a ni dawn a, Pro Volleyball League-a tel zui zel turin Thutak Nunpuitu Team (TNT)-in playoff an pal tlang a ngai dawn.

Pro Volleyball League inkaihhruainaah mipa team pariat an tel thei ang tih a awm sa a, Inrinni khan a vawi khat nan 2026-27 season atan Mizoram Volleyball Association (MVA) executive committee thu khawmin season tharah Pro Division mipa inelnaah team riat tel turin thutlukna a siam.

Season liam taah mipa team pasarih inelin TNT an hniam ber a, a sang paruk - Hunthar, Khawbel, Anastasia Electric Veng, Chhinga Veng Spikers, Sihphir leh Tuichangralin Pro Volleyball an khel zui thei dawn a. Hmun ruak dang pahnih inchuhin TNT leh district team thaten playoff an khel dawn a ni.

District association hnuaia season khat chhunga sang ber leh pahnihnain Pro Division playoff an khel thei a, heng team-te hi an inhuam a nih chuan July 4, 2026 tlai dar 3:00 ral hmain MVA hnenah dilna an thlen ang a. District atanga playoff khelh huam lo an awm a niha inhuam dang an awm a nih chuan an district hruaitute hriatpuinain dil theihna hawnsak a ni bawk.

July 9, 2026 atangin playoff khelh tan a ni dawn a, district association hnuai atanga telte inelin a sang ber an tlang nghal ang a, pahnihna leh season liam ta Pro Division-a hniam ber, TNT-in hmun ruak pakhat an inchuh zui ang.

Pro Division playoff-a tel tur team-te hian season liam taa player an neih sa bakah Pro Division player ni lo pahnih an lak belh thei a, hnam dang lak erawh phal a ni lo va. Player an lak thar turte hi district association hriatpuinaa kalpui tur a ni bawk.

Pro Division club-te tan playoff khelh zawh, July 21-25, 2026 chhungin season thara an player-te ziah luhna hun hawn a ni a, hemi chhung hian district leh zone hnuaia club hrang hrang player-te pawh an inziak lut ve nghal dawn a ni.