ZALEN, Apr. 14, 2026: Tuichangralin an nghah thlawn fo tawh an duhthusam tihhlawhtlin ngei tumin hma an la a, a vawi khat nan Pro Volleyball League champion ni thei turin ram dang player lak luh theih an inbeisei.

Kum 2016-ah Pro Volleyball League tan a ni a, kum 2018-ah Mizoram volleyball inelna sang berah Tuichangral hi inlan tanin Aizawl pawn atanga tel hmasa ber an ni a, boruak pawh an nei nghal a, final lutin Hunthar an hneh lo hlauh.

Tla lovin Pro Division-ah an awm zui char char a, kum 2024 khan a vawi hnih nan final lut lehin Hunthar lakah bawk an tlawm leh a. Season liam taah Mizo player langsar kawl khawmin champion ngei tumin team an din a, league-a sang ber niin rin hlawh mah se semifinal-ah Thutak Nunpuitu Team (TNT) hneh lovin an tla.

Season liam ta khan Tuichangral hian Pro Volleyball League atan Rajnesh Singh la lutin Mizo player tha - Zomuansanga, Johan Vanneihsanga, Vanlaltanpuia leh setter C Zonunmawia an kawl a, team tha tak ni chungin final an lut zo lo.

Manager David Aizampuia chuan tun season-ah nikum angin Mizo player langsar an nei tawh lo tih a sawi rualin team tha tak erawh an la ni reng a, champion ngei tumin an bei dawn tih a sawi.

Mizo spiker tha pahnih, Zomuansanga leh Johan Vanneihsanga’n an chhuahsan bakah setter C-Tea’n Chhinga Veng Spikers a zawm bawk a, nikuma TNT-a khel, Saidingpuia Sailo an la kir ve thung.

David-a chuan squad tichak turin Sri Lanka player tha, Europe-a inkhel mek lak luh tumin an dawr a, visa an tifel thei a nih chuan Tuichangral tan a khel thei dawn tih a sawi a, kum kal ta angin player mal khaia langsar nei tam lo mah se team tha leh nomawi chuh phak an nih theih ngei a ring.

Tun thla atangin mumal leh zualin Joint YMA Indoor Stadium, Vaivakawn, Aizawlah Tuichangral an inbuatsaih a, mipa team bakah a vawi khat nan hmeichhe team nen Pro Volleyball League-ah an tel kawp dawn a; season hawnna tournament, September khan an hmeichhe team an champion nghe nghe.

Pro Volleyball League vawi kuanaah hian mipa team sarih leh hmeichhe team li an inel dawn a, May 11 zanah LPS Arena, Falkland, Aizawlah tan a ni ang.