ZALEN July 17, 2026: Pachhunga University College chuan vawiin khan an college atanga zirlai pass thar te lawmpuina ‘felicitation’ programme an hmang a. Mizoram University-in under graduate result a tihchhuah takah khan PUC atang hian graduate thar 708 an awm a, heng zingah hian rank holder 122 an awm a ni.

Zirlai pass thar te chawimawina hi an college Multipurpose Auditorium-ah hmangin, Higher & technical Education Minister, Dr. Vanlalthlana chuan khual lian niin a hmanpui a. College Magazine 'Buannel' a tlangzarh bawk. He programme-ah hian khual lian chuan, "Khuangchera khan lehkha zir sang lo mah se, a ramin a koh angin a ram tan a nun a hlan a, keini thangtharte hi kan ramin min ko mek. Resources tha tak tak kan nei, heng hi system tha zawk nen kan enkawl a, kan thiamna hmanga kan tihpun a, kan ram tan kan thiamna kan hlan a pawimawh a ni," a ti. Dr. Mathlana chuan, Mizoram leh kan hnam nunphung hi a nuam a, kan thlahlel thin. Mahse, kan confort zone atang hian tal chhuakin khawvel zau zawkah kan talchhuah ve ngam a ngaih thu a sawi bawk. 

Pachhunga University College-ah hian BA pass thar 401 an awm a, B.Sc pass thar 209, B.Com pass thar 55 leh BBA pass thar 35 an awm a, an vaia pass thar hi 708 an ni. Kuminah hian exam beitu 791 atangin 708 an pass a, zirlai 83 chu an hlawhtling zo ve ta lova, an pass percentage hi 89.90% a ni.

Kumin result-ah hian PUC atangin rank holder 122 an awm a, heng zingah hian subject topper 12 an awm. Science lamah Laltluangpuii, Physics department chu Gold medalist a ni.

Zirlai pass thar zawng zawng te hi chawimawina thuchei leh thilpek an pek vek bakah mimal chawimawina hrang hrang an pe bawk a. Arts lama mark hmu sang ber, Grace Lalrinpari Hauzel, History department hnenah ‘H.K. Bawichhuaka Award’ an hlan a. Science lama mark hmu sang ber Laltluangpuii, Physics department hnenah ‘Lenrual Hlui Award’ an hlan a, Commerce lama mark hmu sang ber, Namrita Sharma hnenah ‘Khawtinkhuma Award’ hlanin, Management lama mark hmu sang ber, Chanchan Lambiakhoih hnenah ‘Dr. H. Lallungmuana Award’ an hlan.

Hei bakah hian stream hrang hranga mark hmu sang ber Laltluangpuii, Physics department hnenah ‘PUC Alumni Association Award’ hlan a ni a. Zirlai titha te hnenah coaching an kal chhunzawm theihna turin ‘MS Academy Scholarship Award' chu H.Lalmuanawmi, Physics department hnenah an hlan bawk a ni.

Zirlai lawmpuina inkhawmah hian Khual zahawm, Prof. Lalnuntluanga, Controller of Examination, Mizoram University chuan Students’ of the year atana thlan, Grace Lalrinpari Hauzel, Department of History hnenah chawimawina a hlan a. Principal, Prof H. Lalthanzara’n zirlaite lawmpuina leh fuihna thu a sawi bawk.

He programme-ah hian zirlai zaithiam hrang hrang an zai a, lam mawi tak tak entir a ni bawk a. Zirlai zinga library hmang tam ber hnenah ‘Best Library User Award’ chu Vice Principal, Prof. Margaret Z. Khiangte chuan a hlan bawk a ni. 

PUC-ah hian tunah zirlai 3114 an awm mek a. State 13 atangin national students 63 leh ram hrang hrang atangin international students 12 an awm bawk a ni.