Aizawl: West Phulpui leh Pukzing inkar quarry chimin a delh hnan nia hriat ruang chu vawiin tlai dar 5 vel khan hmuh a ni a, finfiah turin police an thang mek.

December 20, 2023 (Nilaini) khan West Phaileng leh Marpara inkar kawng siam hna thawktu, SLR company-ten hnathawka an chhawr mi pathum chu quarry chim hian a delh a. Faizul Haque (32) Silchar ruang chu hmuh nghal niin mi dang pahnih, Suresh Kumar Jat (29) leh Krishnaram (41), Rajasthan-a chengte ruang erawh lungin a delh avangin lakchhuah mai theih a ni lo.

Vanduaina tawkte ruang lakchhuah tum hian PWD leh kawng siamtu company ten theihtawp an chhuah a. Zalen thudawn danin vawiin tlai dar 5 vel, khaw thim dawn khan ruang nia hriat hi hmuh an ni a; mahse, khua a thim tawh deuh avang leh ruang hi a chhiat deuh tawh avangin finfiah theih a ni hrih lo a. Chhanchhuah hna thawktute hian eng an neih that tawk loh bawk avangin chhunzawm zel tur nge naktuk lama tha thara thawh leh tur an ngaichang mek a, ruang an hmuh hi silpauline in an khuh hrih nia hriat a ni.

Ruang hi mi pahnih nge pakhat tih pawh an la chiang thei lo nia thudawn a ni.