ZALEN March 2, 2026 : Home minister K Sapdanga'n Mizoram a raltlan zingah sumdawng an awm tih sawiin, phal loh a nih thu leh thubuai rip tak awrh mek te pawh an awm tih house a hrilh.

Vawiin assembly budget session zawhna leh chhanna hunah member te zawhna leh zawh belhna te chhanga he thu hi sawiin, home minister chuan, ni 5.2.2026 thlengin Myanmar raltlan mi 26,381 chhinchhiah an nih tawh thu leh ni 5.2.2026 thleng khan Myanmar raltlan mi 1974 chhinchhiah zawh loh, hmabak an la awm thu a sawi.

Home minister chuan kan unau, Myanmar raltlan te chu mangang, hlauthawng leh harsa taka rawn chhuk thla an nih thu sawiin, "Sawrkar duhna hmunah pawh an awm thei bik lo a, anmahni duhna hmunah pawh an awm thei lo, a rem remah an awm darh a, an awmna hmun tur atana ruahmante nei thin bawk mah ila, an awm tak tak thei thin lo. Ruahmantu tan pawh a tih tak tak theih loh a, raltlante tan pawh a tih tak tak theih loh," tiin a sawi.

Raltlan te an sumdawng deuh noh noh nia hriat a nih thu pawh sawiin, home minister chuan, theihtawp a an chhui zel thu a sawi a, man tul te pawh an man a, an thil zawrh leh tawlh vel a zirte pawh a thubuai rip tak tak awrh mek te pawh an awm thu a sawi bawk.

#ZalenNews