ZALEN September 20, 2026: Mizorama raltlante enkawlna atana Mizoram sawrkarin sum a sen tawh zat chu Rs. 2,85,39,611 a tling tawh a. Myanmar raltlante biometric enrolment-a chhinchhiah hna 98.90% zawh fel tawh a ni.

Home department tar lan danin Mizorama raltlan lutte hi Myanmar, Bangladesh leh Manipur atanga lutte an ni a. August 20, 2026 thlenga raltlan chhinchhiah zat chu Myanmar – mi 29,575, Manipur – mi 6,959, Bangladesh – mi 1,679, an vaiin mi 38,213 an tling.

Mizorama Myanmar raltlante biometric enrolment-a chhinchhiah hna chu 98.90% zawh fel tawh a ni a, Bangladesh raltlan biometric enrolment-a chhinchhiah hna hi 100% zawh a ni tawh.

Mizorama raltlan lutte hi state sawrkar chuan district tina DC te kaltlangin chhawmdawl hna hi a thawk mek zela, an awmna tur relief camp siamsak niin an ei tur buhfai leh mamawh dang pek thin an ni.

Hetihlai hian raltlan chungchangah Ministry of Home Affairs atangin tun hnaiah Mizoram sawrkara home department chuan thuchhuah thar dawn a nei lo.