ZALEN, Apr. 30, 2025: Zirtawpni kal ta atanga Maharashtra-a 1st Federation Cup 2024-25 khelhah Mizo nula, Ramdingliani chuan Mizoram tan Under 49 kg (Junior category)-ah gold medal a la.

Ningania zawh tura ruahman, Nashik khawpuia Divisional Sports Complex-a India Taekwondo (tun hmaa Taekwondo Federation of India tih thin) buatsaih inelnaah hian Chanmari West, Aizawl nula hian a tir phat atanga final thlengin a tumpui apiang a hnehsawh hle tih theih a ni.

Final-ah hian Jharkhand atanga tel, Aastha Kumari chu round hmsa berah 3-3-a inhnehtawkpuiin round dawt lehah 3-0 leh round hnuhnung berah 5-0-a hnehin gold hi a hlawh chhuak a ni.

Rami hian round of 16 atanga bul tanin a thlengtu, Maharashtra atanga tel, Rajapurkar chu round khatnaah 13-1 leh round hnihnaah 12-0-in a hneh a. Quarterfinal-ah Tamil Nadu atanga inlan, R Durga Shree Devi lakah round hmasaah 7-0 leh round hnihnaah 9-0-in a chak.

Sports Authority of India (SAI) hnuaia National Centres of Excellence (NCoE), Lucknow, Uttar Pradesh-a taekwondo zira awm mek Rami hian semifinal-ah Uttar Pradesh aiawha fehchhuak, Garima chu round khatnaah 11-0 leh hnihnaah 8-0-in a hneh leh a ni.

Rami hian India ram pum huap inelnaa medal 22 a lakna a ni tawh a, nikum khan South Korea-ah World Taekwondo Junior Championships-ah pawh India tan a lo khel tawh bawk a ni.