Ramri buai chungchangah Tripura nen inbiak tum: Home Minister

ZALEN September 07, 2026 : Home Minister K. Sapdanga chuan tun thla chhung hian ramri buai chungchangah Tripura sawrkar nen inbiak tum a nih thu leh Assam sawrkar nen thla thar lamah inbiak hman tum a nih thu a sawi.

K. Sapdanga chuan Assam sawrkar nena ramri buai chungchanga inbiakna tur hi hun rei tak ruahman a ni tawh a, official te inbe thuai turin kalpui a ni a ti a. Chuti chung chuan ramri chungchangah bawk Tripura official te leh Mizoram official te hi tun thla chhung hian inbe turin ruahmanna siam a ni tih sawiin, he mi zawhah hian Assam sawrkar official te leh Mizoram sawrkar official te inbiakna hun tur tihfel a ni ang a ti a, October thla lam a nih tawh a rin thu a sawi a ni.

Tripura sawrkar leh Mizoram official te ramri buai chungchanga an inbiakna tur hi Agartala khawpuiah nghah tura ruahman a ni a, a hun tur tak hi tihfel a la ni lo chungin Tripura lam chuan September ni 7 leh ni 17 inkar chhung vel hi an rawn rawt nia thu dawn a ni a. Mizoram sawrkar nen a hun tur hi tihchian a la ni ang.

Tripura nena inbiak turah hian Phuldungsei khua leh Thaidawr tlang chungchang chu ngaih pawimawh a ni dawn nia hriat a ni a. Phuldungsei khua hi Mizoram leh Tripura sawrkarin an ram chhunga awm anga an hauh ve ve a ni a. A khaw chhunga chengte ration card petu zawk nih inchuh a awm bakah Thaidawr tlanga Tripura sawrkarin in rawn sak a tum chungchangte pawh sawi a nih rin a ni a. Hei bakah hian ramria harsatna awm thei dangte pawh zau taka sawi tura ruahman a nih thu an sawi.

Assam leh Mizoram sawrkar official te inbiakna tur chungchang hi hun rei tak tihkhawtlai a ni tawh a. Nikum April ni 25-a Guwahati khawpuia an inbiak khan a hma thei ang bera inbiakna chhunzawm tura dah a ni chungin kumin April thlaa Assam Assembly inthlan a awm bakah chhan hrang hrang vangin inbiak lehna hun hi tihkhawtlai a ni.

State pahnih official te hi an inbepawp reng chungin Aizawl khawpuia an inbiakna hun turah thuthlukna an la siam hlei thei rih lo a, Home Minister sawi ang hian October thlaah chuan an inbiak theih ngei tawh beisei a ni.