ZALEN December 17, 2025: Excise Minister Lalnghinglova Hmar chuan vawiin khan a pisa-ah thu thar thehdarhtute a kawm a, Aizawl dai hnai — Rangvamual, Phunchawng leh Tuikhurhlua zu-te laboratory-ah endik chungchangah a vawi thumna atana endik tir leh tura hmalak a nih thu a sawi.

Lalnghinglova Hmar chuan hemi chungchanga zawhna a chhan naah, he'ng hmuna Zu-te hi mihring hriselna tana a hlauhawm dan hriat chian a nih theihna atan Delhi-a Central Laboratory-ah endik tir a ni tawh a. Tum hnih endik tirin result pawh an dawng tawh a; mahse, a quality a inthlauh em avangin a tum thumna'n laboratory dangah endik tir leh a ni dawn tih a sawi.

Excise Minister chuan, "Tum hnih kan endik tir tawh a, a result a inang lo ve ve. Tum khatah a quality a chhe hle a, tum khat dangah a chhe lem lo thung. Chuvangin, chawhruala a result khaikhawm theihna'n laboratory dangah endik tir leh a ni dawn a. Hemi hnuah chuan endik nawn leh ngai tawh lovin, a dinhmun dik zawk a hriat theih tawh dawn a, mipui hriatah pawh a puanzar theih tawh ang," a ti.