ZALEN, October 28, 2025: India ram chhunga cricket inelna sang ber leh ngaihhlut hlawh ber, Ranji Trophy-ah Mizoram chuan Thawhlehni khan Arunachal Pradesh chu thawh (innings) leh run 55-in an hneh a, Plate Group-ah hma an hruai.

Ranji Trophy hi ni li chhung khelh thin niin Board of Control for Cricket in India (BCCI)-in a hnuaia association-te tana mipa inelna a buatsaiha a sang ber a ni a. Mizoram hi khelh hmasak berah Meghalaya nen Shillong-a inkhel tur ni mah se ruahin a tihbuai tluan avangin point khat ve ve hmuhtir an ni.

Khelh hnihna hi Inrinni atang khan Gujarat College Cricket Ground ‘A’, Ahmedabad, Gujarat-ah khel tanin Mizo tlangvalte hian thawh hnih an neihah thawh khat chauh thawk chungin Arunachal Pradesh hi an hneh a, an sawp hle tihna a ni.

Arunachal Pradesh hian vaw hmasain thawh khatnaah run 187 chauh siamin an thi vek a, Mizoram tan Champhai tlangval, Lalrempuia chuan mi pathum a vawm hlum a, K. Vanrotlinga leh Bobby Zothansanga ten pahnih ve ve an vawm hlum bawk.

Mizoram hian an vuak thawh khatnaah an chhang let tha hle a, association pawn lam atanga player lak luh, Armaan Jaffer chuan century siamin ball 163 a hmachhawnah run 144 a vaw chhuak a. Amah thlawpin Sahil Reza (run 65) leh F. Vanlalmuanzuala (run 55) ten half century an siam bawk a. Run 389 an siamah mi paruk chauh hlohvin an duhtawk (declare).

Thawh hnihnaah pawh Arunachal Pradesh hian an umphak ngai hautak tak an umnaah Mizo bowler-te an ngam chuang lo va, Marema bawk langsar lehin mi panga a vawm hlum a, Vanrotlinga’n pathum a vawm hlum bawk a. Techi Neri-a’n run 91 vaw chhuak ve mah se batter dang run 10 siam tling pakhat chiah a awm a, thawh khatnaa an vuak chhuah zat pawh tlin lovin run 144 an siamah an thi zo.

Arunachal Pradesh-in thawh hniha an vuak chhuah hian Mizoramin thawh khata an vuak chhuah chu run 55-in phak lo va, chiang zetin an tlawm ta tihna a ni.

Ranji Trophy kal mekah hian Mizoram hi Plate Group-ah Bihar point li ve ve an hmu tawh a, quotient-a tha zawk an nih avangin hmahruaitu zawk an ni a. Bihar, Manipur leh Sikkim an la hmachhawn leh ang a, an group-a a sang ber pahnihin final khelin champion-in season tharah Elite an kai dawn a ni.

INKHEL CHANCHIN TAWI:

Arunchal Pradesh 187

Lalrempuia 3/47

Mizoram 389/6

Armaan Jaffer 144 (163)

Arunchal Pradesh 144

Techi Neri 91 (110)

Lalrempuia 5/63

Innings leh run 55-in Mizoram an chak.

MIZORAM KHELH HMABAK:

Nov. 01-04, 2025 - Mizoram vs Sikkim

Nov. 08-11, 2025 - Mizoram vs Manipur

Nov. 16-19, 2025 - Bihar vs Manipur