ZALEN, Oct. 29, 2024: India ram chhunga cricket hmanga state/association-te inelna sang leh ngaihhlut hlawh ber, mipa senior team inelna, Ranji Trophy 2024-25 khelh mekah Thawhlehni khan Mizoram chuan run 20 leh innings-in Manipur an sawp.

Cricket-ah hian ni khat aia tam khelh chi (multi days format) an tih, team khatin thawh (innings) hnih an neih theihna inelna, Ranji Trophy khelh dan hmang angah hian vawi hnih thawha tumpuite vawi khat thawh umphak loh khawpa chak loh chu chak loh dan chiang ber a ni a, hetiang hian Mizoram hian a thenawm state hi a sawp a ni.

Gokulbhai Somabhai Patel Stadium, Nadiad, Gujarat-a Pathianni atanga inkhelh tanah hian Manipur hian vawi hnih an vuakah run 270 leh 246 an siam a, Mizoramin an vawi khat thawha run 536 an siam chu vawi hnih vuakah hian an umphak run 20-in an phak lo va, Mizoram hian thawh khat la hmang bangin hnehna an chang a ni.

Mizoram tan hian guest player chhuanvawr, Agni Chopa chuan ball 269 a hmachhawnah run 218 lai vaw chhuakin an chakna bul a ni a, Man of the Match atan thlan a ni a. Ani bakah hian Jehu Anderson (67), Mohit Jangra (60) leh Vikash Kumar (55) ten half century an tlin bawk.

Manipur vuak hmasak zawkah hian KC Cariappa chuan run 89 pein mi panga a vawm hlum a. Moses Ramhlunmawia’n wicket thum a la bawk a, an tumpuiten run 270 chauh an tlin theih nana thawhhlawk pahnih an ni.

An vuak thawh hnihnaah pawh Cariappa bawk langsar lehin wicket li a la leh a, all-rounder Jangra-a’n pathum a vawm hlum bawk.

Mizoram hi Plate Group-ah awmin vawi thum an khelh tawhah vawi hnih an chakna a ni ta a, Manipur an sawp avang hian tum khata point hmuh theih sang ber, point 7 hmuin point 13 an nei ta a. Khelh hmabak pahnih an la nei. 

Mizoram hian karleh Nilaini atang hian Ahmedabad-ah Goa an khel leh dawn a, November 13 atangin Nagaland an khel leh bawk ang.  

An hmabak pahnihte hi anmahni ang thova point 13 hmu tawh ve ve an ni a, an inkhel tur hi final luh leh luh loh hriltu a ni dawn tihna a ni a. Final an lut a nih chuan Plate atangin a thiam zawkte inelna, Elite-ah an kaisang thei dawn a ni.

Cricket Association of Mizoram (CAM) chuan Mizoram mipa senior team player leh supporting staff zawng zawngte chungah lawmthu sawiin a chhuang takzet tih an sawi a, an khelh leh turah pawh duhsakna an hlan bawk.