ZALEN February 10, 2026: AH & Vety Minister C Lalsawivunga chuan ranvulhtute tan vawiin khan Animal Insurance a tlangzarh. Hemi atan hian National Insurance Company Ltd. leh AH&Vety Department Secretary Lalsangliana ten Minister leh MSPCC Vice Chairman Dr. KC Lalmalsawmzauva hmaah thawhhona thuthlung an ziak a ni.

Animal Insurance hian ranvulh hrang hrang (vawk, bawng, sial, kel, berawm) a huap dawn a. Implementing agency atan National Insurance Company Ltd thlan an ni. Premium zaa sawmpanga (15%) hi ranvulhtu ten an tum ve tur a ni a, Handholding hnuaia progress partners te erawh chu handholding atanga tumsak vek an nih dawn thung. Vawk vulh insurance atan cheng 2000 chawi tur kha cheng 292 chauh farmer (Bana Kaih Scheme progress partner ni lo) ten an tum a ngai dawn a ni.

Minister C. Lalsawivunga chuan sorkarin animal insurance ah theihtawp a chhuah thu sawi zuiin, Animal Insurance-a State Matching Share 30% pawh 10% a tihhniamsak turin Union Minister ah a ngen thu leh Mizoram ngenna angin 10% ah tihhniamsak a nih thu a sawi a. Vawiina insurance tlangzarh tak atan hian Central atangin Rs 66.49 lakhs hmuh a nih thu leh, hei hi first installment chauh niin, first instalment ah hian ran 4545 insured tum anih thu a sawi a. Sawrkar chu ranvulhtute hmangaihtu anih thu leh ASF avanga tuar te tawrhpui nan ASF chu state specific disaster ah puan anih tawh thu te, ASF tuarte zangnadawmna compensation pek thin an nih thu te a sawi bawk.

Animal Insurance hnuaiah hian National Insurance Co. Ltd. atangin insurance dil dan tur tlangpui leh insurance hmuh theih dan te ngaihthlak a ni a. Insurance claim hi state dang a refer ngai lovin Aizawl ah chinfel theih a nih tur thu an sawi a ni.