ZALEN August 06, 2026 : India sawrkar laipui chuan Reserve Bank of India (RBI) rawtna pawmin plastic pawisa hman chhin an remti a, Rs. 10 leh Rs. 20 an siam chhuak chin dawn.

Minister of State for Finance Pankaj Chaudhary chuan July 27 ah khan Lok Sabha hnenah RBI rawtna pawmpuina lehkha hi a lo theh lut tawh a. RBI hian en chhinna atan Rs. 10 leh Rs. 20 hi a vaia belh khawma Rs. 3,000 crore hu vel an siam chhin phawt ang.

Ruahmanna an siam dan chuan heng plastic pawisa hi khawpui thlan bik panga - Kochi, Mysore, Jaipur, Shimla leh Bhubaneswar ah te an hmang chhin phawt ang a. Heng khawpui panga an thlan chhuah chhan chu boruak uap deuhah te, hmun vawt deuhah te engtin nge pawisa chhuak thar chu a awm dawn tih an hriat duh vang niin an sawi.

Plastic pawisa hi lang tlang thei khawpa pan a ni ang a, huh mah se a chhiat phah dawn lo a, a thler mai mai dawn lo bawk a. Lehkha pawisa ai chuan a let 4 vela tlo zawk tura ngaih a ni a, pawisa lem a tlem phah an beisei bawk a. Chutih rualin lehkha pawisa thlakna atana ruahman erawh a ni lo tih an sawi a ni.