ZALEN June 2, 2025 : PC Lalthakima, Rimawi Khawvel chanchinbu editor leh Rimawi Khawvel award buatsaihtu chu Thawhtanni chawhma dar 11:15 khan Aizawl Civil Hospital ah a boral.

PC Lalthakima hi taksa chaklohna hrang hrang avangin hunrei tak a bawksawp tawh a, kar hmasa lam khan Aizawl Civil Hospital ICU ah dah a ni a, a natnaten zual lam pan zelin vawiin chawhma lam khan a boral ta a ni. PC Lalthakima hi a chenna Ainawn Veng ah vui a ni ang.

PC Lalthakima hi Zoram rimawi khawvela mi hriat hlawh tak a ni a, rimawi chanchin ziahna chanchinbu te buatsaihin hla lar tak tak, Mizo zaithiam langsarte larpui hat tham hla emgemawzah a phuah a ni.

Fakna hla lar tak tak a phuah zingah  Thiam Channa Kros, Thlarau Thianghlim A Tawk, Kan Âwi Nâng Che, Ka Fa Lo Haw Rawh, Kum Sang Bi Tharah Krista Tan tihte chu Zoram pum huap dengchhuak khawpa hla lar leh Pathian hman an ni.