ZALEN March 23, 2026: Mizo Hnam Runah chhung inkhawm vawiina neih a, thusawitu MNF Adviser Robert Romawia Royte, MLA chuan ZPM-in Thenzawl-a state capital sawn an tum vang leh an MLA pakhatin eng thil thar mah awm tawh lo se a duh thu a sawi hian ZPM chu AMC-ah sawrkar tir chi nia a ngaih loh thu a sawi.

Robert Romawia chuan, "ZPM Chief Minister Lalduhoma hian ama bial Thenzawl-a Aizawl State capital sawn rawtna Central sawrkar-ah ziakin a submit ngei a, sum pawh dilin an hmu bawk. Mizoram Capital Thenzawl-a sawn hi Aizawl mipuite hian an duhin ka ring lo. Chu mai a ni lo, ZPM MLA pakhat phei chuan Assembly session-ah Aizawl-ah eng thil thar mah awm tawh lo se a duh thu hial Assembly session-ah sawi a nih kha. Hetianga Aizawl dah pawnlang leh ngai pawimawh lo hi AMC-ah sawrkar tir chi an ni lo," a ti.

MNF MLA chuan, "AMC-ah kum 10 chuang MNF a sawrkar tawh a, AMC that leh chhiatah pawh mawh a phur a ni," a ti a. "AMC hi India rama urban local body tha ber pawl a ni a, North East bikah phei chuan an entawn ber a ni. Kan AMC te hi an chhuanawm em em a ni. Dawt nena phuah pawlha ram leh hnam pawi tam tak khawihtute hi AMC-ah hian sawrkar tir ngam chi an ni lo," a ti bawk.

RRR-a chuan Budget session thlirletna neiin, "ZPM awm hma chuan session-ah House Leader, Minister leh MLA ten dawt sawi an hlau hle a, dawt sawi hriat tur a vang. Tun sawrkarah chuan dawt sawi a tam em em mai a, an din lai ngeia tihdikna lo siam ngaite pawh a awm hial a ni. CM leh a naute hian Assembly Session pawh zah zo lovin dawt an sawi nasa hle a. Ruling MLA ṭhekhat pawhin an CM dawt sawi nasa lutuk chu hreawm an tih thu an sawi hial a ni," a ti bawk.

"ZPM hian opposition an nih laiin sum puk chungchangah, 'mipui min dahkham', 'kan puk ve dawn lo' titein an sawi thin a. An han sawrkara a puk theih zawng zawng an puk a, a tam thei ang ber puk hi an policy a ni. Tun Session-ah ngei pawh khan thil thleng ngai lo leh thil awm theiah pawh ngaih loh a thleng a. Chu chu kan budget aiin kan leiba a tam zawk kha a ni. MNF sawrkara thleng nise ZPM ho hi an nasa ngawt ang," Robert-a chuan a ti a. "Kan CM-in 'kan tihthat vangin SASCI ah lawmman kan dawng' a tih te kha dawt pachal a ni a, lawmman dawn ni lovin Central duhdana Reform siam vanga sum puk belh phalna mai a ni," a ti bawk.

MNYF President chuan, "SASCI chungchangah India ramah a ti tha ber pali-na kan nih thu Chief Minister hian a sawi a. Hei pawh hi dawt pachal bawk a ni. SASCI-ah hian khawi level-ah mah ranking pek a awm lo. Pakhatna pawh an awm lo a, pahnihna pawh an awm lo a, sawm pasarihna pawh an awm chuang lo. Kan Chief Minister hian hmun thenkhata a dawt sawi hi amah bawk hian a awih leh a, a thutak sawi zui hmiah hmiah zel niin a lang," a ti a. "Dawt an sawi chak em avang hian MNF hian thudik kan sawi chak ve a ngai a ni," a ti bawk.