ZALEN June 19, 2026: Mizo Hnam Rûnah MNF Chhûng Inkhawm chu vawiin khan Thalai pualin neih a ni a. He huna thu sawitu Robert Romawia Royte, MLA chuan Mizoram sorkarin sum a enkawl dan a thiam loh avangin Mizoram tâna sum sanction sa leh ruahman sa an ti lapse nasa hle niin a sawi. Ropeway leh Skywalk case in a dikna a phochhuah ngei a rin thu a sawi bawk.

MNYF President chuan MNF sawrkar chhûng khân sum lapse a awm lo a ti a. Chief Minister, Finance Minister ni bawk Lalduhoma chu ZPM sawrkar theih nâna thawh hlawk tak K.Sapdanga dah nil dan zawnga sawrkar leh party kalphung pela che velah a puh a ni. 

Robert Romawia Royte chuan, “CM Pu Duhoma hian a Senior Cabinet Minister dah nil leh tihmualpho tuma a hmanhlelh avangin sawrkar kalphung a buai nuai a ni" a ti.

Ropeway leh Skywalk Lok Ayukta-in a chhui chungchâng sawiin Robert Romawia chuan, Tourism Minister a nih laia a hriatpuinaa MNF Legal board-te'n FIR submit an nih thu a sawi a. Beisei loh taka accused zinga telh a ni ve chu mak a tih thu sawiin dere pawh a ei rûk loh avangin he case hian a dikna a rawn phochhuah leh a rin thu a sawi.